Ангараг гараг дээр ажиллаж байгаа “Curiosity” өөрөө явагч робот 3,6 тэрбум жилийн тэртээ цэнгэг устай нуур байсан газраас бичил биетүүд амьдарч байсныг нотлох шинж тэмдэг илрүүлсэн тухай “Science” сэтгүүл мэдээлж байна. Лондоны Эзэн хааны коллежийн эрдэмтэн Санжив Гупта “Олон тэрбум жилийн тэртээ энэ нуурын усанд амьдрал байсан гэх нотолгоо бидний сэтгэлийг ихэд хөдөлгөсөн юм.  “Curiosity” нь чулуулгийн бүтэц, найрлахыг илүү нарийвчлан судлах болно” гэжээ.
Өөрөө явагч робот нь нуур байсан газрын шорооноос бактериуд эрчим хүчний эх үүсвэр болгон ашигладаг нүүрстөрөгч, устөрөгч, хүчилтөрөгч, азот ба хүхэр гэх мэт бодисын ул мөрийг илрүүлсний дараа эрдэмтэд тус газар бичил биетүүд амьдарч байсан гэсэн таамаг дэвшүүлээд нотолгоо цуглуулахаар ажиллаж байгаа аж. Судалгааны явцад эрдэмтэд олон тэрбум жилийн тэртээ хатаж үгүй болсон нуурын усны температурыг тогтоож чадсан байна.
Цэнгэг устай нуур нь сул шүлтлэг бүхий, бүлээн устай байжээ. “Curiosity” өөрөө явагч робот нь өнгөрсөн оны арванхоёрдугаар сард Ангараг дээр газардан өнөөдрийг хүртэл судалгаа, шинжилгээ явуулж байгаа билээ.