“Шингэн
түлш шилжүүлэн ачих байгууламж” ТӨҮГ-т улсын төсвийн хөрөнгө
оруулалтаар хийж буй өргөтгөлийн ажлыг өнгөрөгч оны 12 дугаар сарын
25-ны өдөр Улсын комисс дүгнэж, хуулийн дагуу 14 хоногийн туршилтын
хугацаа олгожээ.Энэ хугацаанд өргөтгөсөн хүчин чадлаар ажиллах бөгөөд гүйцэтгэгч компани гарын үсэг зуруулах, зарим дулааны ажилд хийж гүйцэтгэх ажлыг Газрын тосны газартай гэрээ байгуулан гүйцэтгэхээр болжээ. Улмаар энэ сарын 8-нд Улсын комисс дахин шалгаж, ашиглалтад хүлээн авснаар байгууламжийн хүчин чадлыг нэмэгдүүлэх ажил дуусах юм байна.
Ингэснээр Замын-Үүд дэх “Шингэн түлш шилжүүлэн ачих байгууламж” дөрвөн байраар шилжүүлэн ачдаг байсныг механикаар найман байрыг шилжүүлэн ачих, хадгалах савыг ашиглах боломжтой болж, экспортоор орж ирж буй шатахууны ачааллыг багасгахад үр дүнгээ өгөх аж.
Тус байгууламжаар өнгөрөгч онд 176566 тонн газрын тосны бүтээгдэхүүн шилжүүлэн ачиж, 500 тонныг хадгалж, үндсэн үйл ажиллагааны төлөвлөгөөг 300 хувь давуулан биелүүлжээ. Мөн санхүү орлогын төлөвлөгөөг 302 хувь давуулан биелүүлж, зардал хэмнэсэн бөгөөд хөрөнгө оруулалтын төлөвлөгөөг 100 хувь биелүүлэн ажиллажээ.
