Охид, залуу эмэгтэй­чүүдийн эрхийг хамгаалах “Гүнж” төв, “Хөөрхөн зүрхнүүд” төрийн бус байгууллага хамтран “Охид хүчирхийллийн бай биш!!!” сэдэвт кампанит ажлын хүрээнд “Биднийг сонс” Охидын эрхийн анхдугаар форумыг өчигдөр зохион байгууллаа. Уг форумаар дамжуулан охидын дуу хоолой, үзэл бодлыг олон нийтэд хүргэх зорилготой аж. Форумд хот, хөдөөгийн нийт 150 гаруй охид, хүүхэд хамгааллын чиглэлээр үйл ажиллагаа явуулж буй төрийн бус байгууллагын төлөөлөл оролцож, өсвөр насандаа хүүхэд төрүүлсэн залуу ээжүүд, хөгжлийн бэрхшээлтэй болон хөдөлмөр эрхэлдэг охидын эрхийг хамгаалах талаар үндсэн дөрвөн асуудлаар илтгэл тавьж, хэлэлцлээ. Тухайлбал, охид хэрхэн эрх нь зөрчигддөг талаар өөрсдөө асуудал хөндөж, чөлөөтэй ярилцсан юм. Гадуур явахад  нь араас дагах, утасны дугаарыг нь гуйх, зам хааж зогсох зэргээр амар тайван байлгахгүйгээс эхлээд гудамж талбай гэрэлтүүлэггүйгээс хүчирхийлэлд өртөх, хүний наймааны золиос болох магадлал өндөртэй байдаг хэмээн тэд ярилаа.
Форумаас гаргасан ний­гэмд хандсан “Охи­дын уриалга” “Залуу эмэг­тэй­чүүдийн дуу хоолой”, “Эмэгтэйчүүдийн нүдээр, хү­чээр” зэрэг үндэсний фо­рум, чуулганы үеэр танилцуулах ажээ. Монголын өсвөр үеийнхний хөгжлийн үйлчилгээний төвийн нийг­мийн ажилтан У.Өнөрмаа “Энэ арга хэмжээнд бүтэн өнчин, өсвөр насандаа бэл­гийн хүчирхийллийн золиос болж хүүхэд төрүүлсэн за­луу ээжүүд, хөгжлийн бэрх­шээлтэй болон хөдөл­мөр эрхэлдэг хөдөө орон нутгийн алслагдсан сум­дын сургуулийн охидыг орол­цуулж байгаа. Ер нь охидын эрх хаана зөрчигдөж байна, тэр болгоны оролцоог хангах үүднээс оролцогчоо сонгосон” гэж  ярилаа. Охидын эрхийг хамгаалах зорилготой энэхүү форумыг жил бүр зохион байгуулахаар тогтлоо.