Театрын музейд хэд хоногийн өмнөөс нэгэн сонирхолтой үзмэр дэлгэгдсэн нь “Чингис хааны вакс галерей” нэртэй лааны тосон баримлын үзэсгэлэн. XIII зууны 13 баатраар эхний ээлжинд үзэсгэлэнгээ нээсэн ч цаашид өргөжинө гэдгийг тус үзэсгэлэнг гаргасан Б.Хишигсүх хэлж байна. Тэрээр үзэсгэлэнгийнхээ талаар “Эрдэмтдийн баг бидэнд үнэтэй зөвлөгөө өгч хамтарч ажилласан. Монголын нууц товчоо судлаач О.Сүхбаатар, ШУА-ын Археологийн хүрээлэнгийн Б.Энхтүвшин, зоос судлаач, түүхийн ухааны доктор Д.Нямаа нарын эрдэмтдийн хамтарсан зөвлөгөөний үр дүнд дүрүүдээ бүтээсэн. Чингис хааны хөргийн тухайд гэхэд өнөөдрийг хүртэл тогтсон зүйл байхгүй. XIII зууны түүх учраас иймэрхүү байх болов уу гэсэн төсөөллийн дагуу л баримлыг нь бүтээлээ” гэж ярьсан юм.
Тус үзэсгэлэнг гаргахад 40-өөд хүний бүрэлдэхүүнтэй баг ажилласан байна. Монголын анхны лааны тосон музейн үзмэрүүдийг цаашид нэмэгдүүлэх төлөвлөгөөтэй байгаа ч тэр үед байр гэсэн том асуудал гарч ирэхээр байна. Учир нь, уг музейн байрны асуудлыг одоо хүртэл шийдэж чадаагүй учраас Театрын музейг түшиглэн үзмэрүүдээ түр хугацаагаар нийтэд хүргэж байгаа нь энэ юм.