Хүмүүс 24 насандаа л  хүүхэд наснаасаа салж, жинхэнэ том хүн болдог гэнэ. Ийм дүгнэлтийг Мельбурн хотын хүүхдийн анагаах судлалын хүрээлэнгийн эрдэмтэн Сьюзан Сойер болон тус хотын  их сургуулийн профессор Жорж Паттон нар хийсэн байна. Тэднийхээр хүүхэд насыг 18 хүртэл цэглэдэг нь тун буруу гэнэ.  
Дэлхий нийтээрээ 16 хүрч иргэний үнэмлэх авч, 18 нас хүрээд л архи ууж, гэр бүлтэй, сонгууль өгөх эрхтэй болдог гэсэн амьдралын зарчим үйлчилдэг ч 24 хүртлээ хүн өсвөр наснаасаа салаагүй байгаа гэдгээ мэддэггүй. 18 настай хүний тархи архи, согтууруулах ундааг хүлээж авахдаа тун тааруу байдгаас өөрийг нь хамгийн их эрсдэлд оруулдаг гэдгийг эрдэмтэд баталж байна. Учир нь, энэ л насандаа зугатаж болох эрсдэлээс үүдэн маш олон хүн алтан амиа алдсан байдаг аж. Тэдний үзэж буйгаар дэлхий дээр 1.8 тэрбум өсвөр насныхан архи, интернэтэд донтох, БЗХӨ тусах, амиа хорлох эсвэл сургууль дээрээ элдэв аюулд орох эрсдэлтэй нөхцөлд байдаг аж.  Орчин цагийн 18 настнууд тэртээ 50 жилийн өмнөхөөс тэс ондоо болсон гэдгийг хүн бүр мэднэ. Өмнө нь энэ насандаа гэр бүл болж, үр хүүхэдтэй болчихдог, үндсэндээ төлөвшиж эхэлдэг байсан бол орчин үеийн хүүхдүүдийн хувьд эцэг эхээсээ хамгийн их анхаарал халамж хүсдэг нас болсон гэж эрдэмтэд үзжээ. Тэгэхээр өсвөр насны  залуучуудаа элдэв эрсдэлээс хамгаалахын тулд эрдэмтэд хамгийн түрүүнд амьдралын зөв дадал хэвшлийг  эзэмшүүлэх, архи согтууруулах ундаа, мансууруулах бодисын худалдаанд хяналт тавих хэмээн анхааруулж байна. Мельбурний эрдэмтдийн дүгнэлтээр ямартай ч хүүхдээ 24 нас хүртэл нь хараа хяналтдаа байлгах хэрэгтэй гэнэ шүү.