ОХУ-ын Буриад улсын ерөнхийлөгч Вячеслав Наговицын Монгол Улсын парламентын төлөөлөгчдийг гуравдугаар сарын 4-ний өдөр хүлээн авч уулзахдаа хоёр улсын иргэдийн визгүй зорчих асуудлыг хөндөж ярилцсан байна. Мөн эдийн засгийн чөлөөт бүс байгуулах, татваргүй барааг нэмэгдүүлэх нь хоёр талын худалдааны эргэлтийг өсгөх нэг нөхцөл болох тухай ч ярьжээ.
“Бидэнд хоёр талын сонирхол байна. Бид бол монголоос мах махан бүтээгдхүүн, түүхий эд авах сонирхол байхад монголчууд биднээс мод авах сонирхолтой байна” гэж Вячеслав Наговицын хэлжээ.
Буриадын Ерөнхийлөгч монголын талаас тодорхой бүс нутагт визгүй зорчих асуудлыг түргэн шийдвэрлэж өгөхийг хүссэн байна.
Монголын парламентын төлөөлөгчдийн тэргүүн, УИХ-ын гишүүн Д.Эрдэнэбат “Визгүй зорчих асуудлыг Засгийн газрын түвшинд ярьж байгаа, цаг хугацаа шаардах ажил. УИХ-ын хаврын чуулганаар энэ талаар ярилцана, бидний хувьд татгалзах зүйл байхгүй” гэсэн байна.
Мөн Улаанбаатар, Улан-Үдэ хотын хоорондох шууд нислэгийг сэргээх асуудлыг ч тэд ярьжээ хэмээн  newbur.ru мэдээллээ.