Нийслэлийн Засаг даргын санаачилгаар “Нийслэлийн орон сууцны корпорац”- байгуулахаар төлөвлөж  байгаа. Тэгвэл Улаанбаатар хотын Ерөнхий менежер Б.Бадрал, холбогдох албаныхны хамт  Австрийн “Bilfinger Bohr-und Rohrtechnik”  компанийн дэд бүтцийн чиглэлийн дэвшилтэт технологийн талаарх мэдээллийг  өчигдөр сонссон юм. Австрийн инженер Karl Tretller “Монголын нөхцөлд нүүрсийг хийн технологид шилжүүлэн цахилгаан станц барих боломжтойг дуулгахын сацуу олон жил болсон хуучны орон сууцыг нураалгүйгээр гаднаас нь перлит ашиглан шавардан дулаалах боломжтой. Ингэснээр барилгын насжилт нэмэгдэн үл хөрөнгийн үнэ цэнэ нэмэгдэх давуу талтай” хэмээлээ. Харин нийслэлийн Засаг дарга “Орон сууцны 30 хувийн урьдчилгаа мөнгө өгөх хуримтлалгүй, моргейжийн зээлд хамрагдаж чадахгүй байгаа иргэддээ зориулж нийслэлээс орон сууцны хөтөлбөр хэрэгжүүлэхээр төлөвлөж байгаа. Энэ нь, орон сууцны даатгалын шинэ системийн эхлэл болно. Орон сууцны хөтөлбөрийг хэрэгжүүлэхийн тулд дэд бүтэц инженерийн шугам сүлжээний дэлхийн шинэ дэвшилтэт техник технологийг Монголдоо нэвтрүүлэх хэрэгтэй байна” гэв.