Хуульзүйн сайд Х.Тэмүү­жинг огцруулах асуудлыг өчигдөр УИХ-ын чуулганаар хаалт­тай хэлэлцлээ. Хаалттай хэлэлцэхээр хуульд заасан болон төрийн нууцтай холбоотой асуудлыг хаалттай хэлэлцэх ёстойг УИХ-ын дарга танилцуулав. УИХ-ын чуулганы дэгийн тухай хуулиар ийм асуудлыг нээлт­тэй хэлэлцэж болохгүй гэж заажээ. Хуульзүйн байнгын хо­роо яагаад хаалттай ху­ралд­­­саныг Ш.Түвдэндорж гишүүн тайлбарлахдаа, “Гүйцэт­гэх ажиллагааны шуга­маар Х.Тэмүүжин сайдыг тангасан, чагнасан байж магадгүй гэж өргөдөл өгсөн. Тэр дагуу прокуророос бичиг ирсэн. Цаг­даагийн байгуул­лагын дар­га нар хуралдаанд тайлбар хийсэн. Гүйцэтгэх ажлын явц хуулиар ил ярьж бо­лохгүй учир хаалттай хуралд­сан. Энэ асуудал нь чуулганаар яригдах учир хаалттай хуралдах ёстой” гэсэн юм. Ингээд санал хураалтаар шийдэхгүйгээр хуульд заасны дагуу чуулганы хуралдааныг хаалттай горимд шилжүүлэв. Хуралдаанд Улсын ерөнхий прокурор Д.Дорлигжав, болон цагдаагийн болон тагнуулын байгууллагын удирдлагууд оролцсон байна.

Чуулганы ирц ч нэлээд өндөр хувьтай байлаа. УИХ-ын гишүүн Су.Батболд, Ц.Даваа­сүрэн, С.Эрдэнэ, Гадаадад томилолттой байж. Харин УИХ-ын гишүүн Р.Амаржаргал, Х.Болорчулуун, С.Дэмбэрэл, Ё.Отгонбаяр нар тасалсан бол Х.Баттулга гишүүн үдээс өмнөх хуралдаанд оролцоогүй аж.
Нэгдсэн чуулганд оролцсон гишүүдийн дийлэнх нь асуулт асуусан байна. Хуралдаан завсарлаад эргэж орсон ч асуулт хариулт дуусаагүй байхад 18 цагийн үед УИХ дахь МАН-ын бүлэг ажлын тав хоногийн завсарлага авлаа. Зарим хууль, хүчний байгууллагын төлөөлөл Хуульзүйн сайд Х.Тэмүү­жинг гэмт хэрэг үйлд­сэн нь тогтоогдож байгаа тухай мэдээлэл хийсэн тул энэ асуудлыг эцэслэн шалгах нь зүйтэй гэж гишүүдийн олонхи нь үзжээ. Ингээд УИХ-ын Тус­гай хяналтын дэд хороонд хугацаатай үүрэг өгч зарим тодорхойгүй асуудлуудад холбогдох байгууллагуудаас нь мэдээлэл авч эцэслэн танил­цуулахыг даалгасан байна.
Хаалттай хуралдсан учир гишүүд ямар нэг мэдээлэл өгөхөөс эрс татгалзсан юм. Зарим эх сурвалжийн хэлснээр гишүүд УИХ-ын чуулганы танхимд шүүх хурал хийж байна гэсэн шүүмжлэл ч гарч. Түүнээс гадна УИХ дахь намын бүлгүүдийг байр сууриа нэгтгэж чадаагүй гишүүд өөрсдийн итгэл үнэмшлээрээ санал өгнө гэсэн “бор шувуу” ч хаалганы гадна нисэв. “Шударга ёс” эвслийн бүлгийн гишүүдээс огцруулах асуудлыг дэмжихгүй нь ч бий гэв. Мөн АН-ын бүлгийг Х.Тэмүүжин сайдыг авч үлдэж магадгүй хэмээх жиг жуг гарсан.
Ямар ч байсан бүтэн сарын турш хөндөгдөж буй Хуульзүйн сайдын бүрэн эрхтэй холбоотой асуудал дахин долоо хоног хойшилж, энэ хугацаанд Тусгай хяналтын дэд хороо тодорхойгүй зүйлүүдийг нягтлах үүрэг хүлээлээ. Тусгай хяналтын дэд хорооны гишүүн О.Баасанхүү, М.Батчимэг, Р.Гончигдорж нар багагүй ачаалалтай ажиллах нь ээ.