УИХ-ын Байгаль орчин, хүнс, хөдөө, аж ахуй болон Эдийн засгийн байнгын хорооны хамтарсан хуралдаан эхэллээ. Энэхүү хуралдаанаар Үйлдвэр, хөдөө аж ахуйн сайд Х.Баттулгыг Засгийн газрын гишүүний үүрэгт ажлаас нь чөлөөлөх эсэхийг хэлэлцэж буй.
Засгийн газрын хэрэг эрхлэх газрын дарга Ч.Сайханбилэг "Засгийн газрын гишүүнийг чөлөөлөх тухай УИХ-ын тогтоолын төслийг Үндсэн хуулийн 39 дүгээр зүйлийн 2 дахь хэсэг, Монгол Улсын Засгийн газрын тухай хуулийн 23 дугаар зүйлийн 1.1-т заасны дагуу УИХ-д өргөн мэдүүлж байна. УИХ-ын чуулганаар хэлэлцэж өгнө үү” гэж хуралдаанд мэдүүллээ. Үүний дараа байнгын хорооны гишүүд Үйлдвэр хөдөө аж ахуйн сайдаас асуулт асууж эхлэв.  Засгийн газрын гишүүн ҮХАА-н сайд Х.Баттулга чөлөөлөгдөх болсон хүсэлтээ "Монгол Улсын Ерөнхийлөгчөөс өргөн мэдүүлсэн Засгийн газрын тухай хуульд өөрчлөлт оруулах төслийг УИХ-аар хэлэлцэж, унагасан. Миний бие энэ төслийг батлах нь зүйтэй гэсэн санал өгсөн. Гэвч хуулийн төсөл УИХ-ын гишүүдийн олонхийн дэмжлэг авч чадаагүй. Тиймээс би өгсөн саналынхаа дагуу УИХ-ын гишүүн Засгийн газрын гишүүнээсээ чөлөөлөгдөх хүсэлтээ өгсөн" хэмээн тайлбарласан байна.
Байнгын хороодын хамтарсан хуралдаанд оролцогсод ҮХАА-н сайд Х.Баттулгын Засгийн газрын гишүүнээс чөлөөлөгдөх хүсэлтийг УИХ-ын нэгдсэн хуралдаанд оруулахаар болсон байна.