УИХ-ын гишүүн Д.Ганбат “Хөдөөгийн иргэдийн амьд­рал ахуйг сайжруулахад ан­хаа­рах ёстой. Үзэж, хараагүй зүйлээ шүүмжилж байна. Улсын хэм­жээнд 5-6 сум цахил­гаангүй байгаагийн гурав нь Баянхонгорт байна. Наадмаас өмнө энэ сумд цахилгаанд холбогдоно. Аймгуудаас хилийн боомтгүй нь ганцхан Баянхонгор. Хилийн боомт байгуулахад зам нь Дархан цаазтай газраар дайрах гээд байгаа учир Оюун сайдтай ярилцаж тойрч гарах талаар саналаа хэлсэн. Засгийн газ­раас удахгүй УИХ-д оруулах дөрвөн боомтын нэгд нь Баянхонгорын боомт орж байгаа. Тиймээс аймгийн удирд­лагууд боомттой болс­ноор эдийн засгийн эргэлт яаж сайжрах зэрэг судал­гаагаа маш сайн гаргаж өгөх хэрэгтэй.

Мэрэгч амьтан, оготнотой тэмцэхээр хор цацсанаас бо­лоод тас, шонхор шувуу үхэж, үрэгдсэн гэдэг мэдээлэл ирсэн. Иймээс аймгийн удирдлагууд цаашдаа байгаль орчинтойгоо зүй зохистой харьцаж ажил­лахдаа анхаараарай” гэв.
Баянхонгор аймгийн есөн сум, хоёр байгууллагын 90 жилийн ой энэ зун тохиож байгаа аж. Найр наадам зохиож ажлаа цалгардуулахгүй байх, бүтээн байгуулалтын ажлуудаа чанартай хийхийг УИХ-ын гишүүн Х.Баттулга, Д.Ганбат нар анхааруулж байв. Аймгийн хэмжээнд 1.6 сая ямаатай учир 132.4 тэрбум төгрөг төвлөрүүлэх тооцоо гарчээ. Аймгийн ДНБ-ий 55 хувийг мал аж ахуй бүрдүүлэх бол 6.1 тэрбум төгрөг үйлдвэрлэлийн салбарт 99.9 тэрбум төгрөг үйлчилгээний салбарт оруулах юм байна.

Улсын төсвөөс санхүү­жүүлэх 10 ажил байсан нь саатаад байгаа учир 2014 оны төсвийн тодотголоор яаралтай шийдүүлж өгөхийг хүслээ. Шинэжинст, Бөмбөгөр, Гур­ван­булаг суманд цэцэрлэг, концессын гэрээгээр аймгийн төвд хоёр сум барих байсан нь төсвөө хүлээж буйг дуулгав. БШУ-ы сайд Л.Гантөмөртэй цэцэрлэгүүдийн төсвийн талаар ярил­цаж байгааг гишүүд хэллээ.

Жижиг дунд үйлдвэрлэлийг дэмжих сангийн хөрөнгө оруулалт одоо болтол орж ирээгүйг аймгийн ЖДҮГ-ын дарга лавласан. Ер нь, том үйлдвэрүүдээ дагаж жижиг, дунд үйлдвэрлэл нь хөгждөг олон улсын туршлага байдаг аж. Том үйлдвэр байгуулаагүй учир олон жилийн турш хийсэн хөрөнгө оруулалт ямар ч үр ашиггүй болж дуусаад, ахиц дэвшил гарахгүй байгааг УИХ-ын гишүүн Х.Баттулга хэлсэн юм. Баянхонгор аймагт ду­лааны станц барих аж­лыг гүйцэтгэх компани шалгар­сан учир удахгүй гэрээ байгуулахаар болс­ноо айм­гийн Засаг дарга танил­цуулахад ямар туршлагатай, чадвартайг нь сайтар судлахыг санууллаа.