“Чингис” бондоос экспорт дэмжих, импорт орлох төслийн уралдаан зарлахад 1151 төсөл ирж 888-ыг нь хэрэгжих боломжтой гэж Засгийн газар, Хөгжлийн банк үзсэн. Үүнээс өнөөгийн байдлаар 20 гаруй нь арилжааны банкны шалгуурт нийцэж, Хөгжлийн банкнаас санхүүжилтээ хүсээд буй гэнэ. Гэвч саяхан твиттерт “888 төсөлд шалгарсан төсөл зарна” гэх зар сонинд нийтлэгдсэн зураг “тэнүүчилсэн” билээ. Үүнийг Ерөнхий сайд Н.Алтанхуягаас тодруулахад “Тийм зүйл яваад байгаа. Тэр бол жинхэнэ хулхидаж байгаа хэрэг шүү.
Засгийн газар төсөл шалгаруулаагүй, шалгаруулах ч үгүй. Ердөө л, бидний тавьсан шаардлагад нийцсэн эсэхийг л хэлж өгсөн” гэв. Тэрээр ийнхүү няцаагаад дараах тайлбар өглөө.
“Бид энэ талаар нэгдсэн мэдээлэлтэй болох хэрэгтэй. Одоо төсөл боловсруулсан хүмүүс төслөө бариад арилжааны банкинд очих юм. Банк таны хийх ажлыг үзээд боломжийн юм гээд зээл олгохоо зөвшөөрлөө гэвэл Хөгжлийн банк шаардлагатай хөрөнгийг Чингис бондоос гаргаад банкинд өгнө. Тэр мөнгөө арилжааны банкаар дамжуулж авсан аж ахуйн нэгж төслөө хэрэгжүүлээд явах юм шүү” хэмээв. Нийт 888 төслийн 579 нь жижиг, дунд үйлвэрлэлийнх бөгөөд хамгийн багадаа 7.8 сая төгрөг, хамгийн ихдээ хоёр тэрбум төгрөг шаардлагатай гэнэ. Бусад 300 орчим төсөл нь өөр салбарынх байгаа аж.