Ерөнхий сайд Н.Алтанхуяг, Хөдөлмөрийн сайд Я.Санжмятав нар өнөөдөр Швейцарь улсад болж буй Олон улсын хөдөлмөрийн байгууллагын гишүүн орнуудын дээд хэмжээний чуулганд Монгол Улсыг төлөөлөн оролцож байна.

Олон улсын хөдөлмөрийн байгууллага нь Засгийн газар, ажил олгогч, үйлдвэрчний эвлэлийн гурван талын хамтын түншлэлд үндэслэн үйл ажиллагаагаа явуулдаг НҮБ-ын төрөлжсөн байгууллага юм. Жил бүр дээд хэмжээний чуулган зохион байгуулж, хөдөлмөрийн салбарт үр дүнтэй ажиллаж байгаа гишүүн орны төрийн тэргүүн, Ерөнхий сайдыг хүндэт зочноор урьж, илтгэл тавиулдаг уламжлалтай. Тус чуулганд ОХУ-ын Ерөнхийлөгч В.Путин, Францын Ерөнхийлөгч Н.Саркози, Польшийн Ерөнхийлөгч Л.Качинский, ХБНГУ-ын канцлер А.Меркель зэрэг олон орны төрийн тэргүүн уригдан үг хэлж байжээ.

Энэ удаагийн хуралд Олон улсын хөдөлмөрийн байгууллагын Ерөнхий захирал Гэй Радар Монгол Улсын шинэчлэлийн Засгийн газрын хөдөлмөр, нийгмийн салбарт авч хэрэгжүүлсэн туршлагын талаар илтгэл тавиулахаар Ерөнхий сайд Н.Алтанхуягийг албан ёсоор урьжээ. Монгол Улсын Засгийн газар хөдөлмөр нийгмийн салбарт “Ажилтай, орлоготой Монгол хүн”, Үндэсний мэргэжилтэй ажилтан бэлтгэх зэрэг хөтөлбөрүүд хэрэгжүүлж, нийгмийн түншлэлийн гурван талт хамтын ажиллагааг шинэ шатанд гаргасныг олон улсын хөдөлмөрийн байгууллага гишүүн орнууддаа мэдээлвэл зохих туршлага гэж үзсэн байна.

Энэ жилийн дээд хэмжээний уулзалт нь НҮБ-ын Женев дэх салбарт “Ажилтай хөгжил дэвшил-хөдөлмөр эрхлэлт 2014” нэрийн дор болж байгаа юм байна. Ерөнхий сайд өчигдөр эх орноосоо мордсон бөгөөд энэ долоо хоногийн пүрэв гарагт ирэх юм байна.