УИХ, Аюулгүй байдал, гадаад бодлогын байнгын хо­роо гадаад харилцааны бод­лого, салбарын үйл ажил­ла­­гааг боловсронгуй бол­гох бод­логын баримт бич­гүү­дийн хэрэгжилтэд хяналт шин­жилгээ хийж, санал дүг­нэлт гаргах хоёр ажлын хэсэг бай­гуулжээ. Ажлын хэсгийг УИХ­-ын гишүүн Д.Дэмбэрэл, УИХ-ын гишүүн М.Батчимэг нар тус тус ахлан ажиллаж байна.

Аюулгүй байдал, гадаад бодлогын байнгын хороо Гадаад харилцааны яамны үйл ажиллагаа, Монгол Улсаас гадаад улсад суугаа Элчин сайдын яам, консулын болон төлөөлөгчийн газруудад монгол иргэдийн эрх ашгийг хамгаалах талаар явуулж байгаа үйл ажиллагаанд үнэлгээ өгөх, хууль эрх зүйн орчныг боловсронгуй болгох, хариуцлага, сахилга батыг сайжруулах цогц арга хэмжээ авахаар төлөвлөжээ. Энэ хүрээнд тус Байнгын хорооны дарга Ц.Оюунбаатар гуравдугаар сард Монгол Ул­саас БНСУ-д суугаа Эл­чин сайдын яамны үйл ажил­ла­гаатай танилцаж, тэнд ажил­лаж байгаа монгол иргэдээс са­нал асуулга авч хүсэлтийг нь сонссон.

АБГБ-ын байнгын хороо­ноос өнгөрсөн сарын 6-ны өд­рөөс эхлэн “Гадаадад ажил­лаж, амьдарч байгаа мон­гол иргэдийн эрх ашиг” сэ­дэвт судалгааны санал асуул­гыг УИХ-ын цахим хууд­саар (www.parliament.mn/polls) авч эхэлжээ. Энэ цахим линкийг Гадаад харил­цааны яамны веб сайт, фэйсбук, твитер хуудас, гадаад улсад суугаа 25 Дип­ломат төлөөлөгчийн газрын болон гадаад орнуудад бай­гаа монголчуудын зарим веб сайтад байршуулсан байна. Байршуулснаас хойш нэг сарын хугацаанд 134 хүн энэ санал асуулгад оролцжээ.
Санал асуулгын явцаас харахад гадаадад ажиллаж амьдарч байгаа иргэдийнхээ эрх ашгийг хамгаалахтай холбоотой эрх зүйн орчныг сайжруулах, гадаадад нарийн мэргэжил эзэмшсэн иргэдийг Монголдоо ажиллаж амьдрах боломжийг бүрдүүлэх, гэр бүлийн гишүүд нь /эхнэр, нөхөр, хүүхэд/ виз авч чадахгүйгээр салах нь нэмэгдэж байгааг анхааруулжээ. Мөн Элчин сайдын яам, консулын газрыг мэргэжлийн чадварлаг боловсон хүчнээр бүрдүүлэх, үйл ажиллагаанд тавих хяналтыг өндөржүүлэх, гадаад дахь хүүхэд, залуучуудын хэл, соёл, уламжлал, эх орныхоо талаар мэдлэг мэдээлэлтэй болгох талаар арга хэмжээг тогтмол зохион байгуулах зэргийг хөндсөн байна.

Монгол Улсаас гадаад улсад суух Элчин сайд на­рыг томилоход монгол ир­гэ­дийнхээ эрх ашгийг хам­гаалахад онцгой анхаарч, асууд­лыг шийдвэрлэхэд түр­гэн, шуурхай үйлчилж ажил­лах үүрэг захиасыг байнга өгдөг. Харин Элчин сайдууд томилогдсоныхоо дараа авч хэрэгжүүлж байгаа ажлынхаа талаар УИХ-д мэдээлэл ирүүлэх талаар тодорхой дэвшил хараахан гараагүй болон гомдол, саналууд нь энэ ажил хангалттай түвшинд хүрээгүйг харуулж байгаа юм.
УИХ-ын гишүүн Д.Дэмбэ­рэлээр ахлуулсан ажлын хэсгийн гишүүдийн Монгол Улсаас гадаадын зарим оронд суугаа Элчин сайд нартай хийсэн цахим уулзалтын үеэр харийн оронд байгаа хүүхэд, залуучуудын монгол хэл, соёл, уламжлал, эх орныхоо талаар мэдлэг мэдээлэлтэй болгох асуудлыг илүүтэй анхаарах хэрэгтэй гэжээ.Энэ талаар зарим Элчин сайдууд Боловсрол, шинжлэх ухааны яаманд удаа дараа хандсан боловч хариу ирүүлээгүй аж.

Иймээс Засгийн газар энэ чиглэлд санаачилгатай ажиллаж, эрх зүйн орчинг боловсронгуй болгох хууль бусад шийдвэрийн төслүүдийг боловсруулах ажлыг эрчим­жүүлэн УИХ-д өргөн мэ­дүү­лэхийг үүрэг болгожээ. Түүнч­лэн Гадаад харилцааны яам Дипломат төлөөлөгчийн газар томилон ажиллуулж байгаа ажилтнуудынхаа мэд­лэг, чадварыг дээшлүүлэх, ялан­гуяа хууль эрх зүйн мэд­лэгтэй ажилтнууд томилон ажиллуулахад анхаарах хэрэгтэй байна гэв.
Байнгын хорооны дарга Ц.Оюунбаатар энэ цахим санал асуулгын дүнгээс монгол иргэдийнхээ эрх ашгийг хамгаалах төрийн бодлогыг тодорхой болгох, цаашид төр, засаг, олон нийтийн байгууллагаас авч хэрэгжүүлэх арга хэмжээний талаар төлөвлөхөд чухал ач холбогдолтойг хэлсэн. Ингээд гадаадад байгаа монгол иргэдийг санал асуулгад идэвхтэй оролцохыг уриаллаа.