Засгийн газар Харилцаа холбооны тухай хуульд нэмэлт, өөрчлөлт оруулах тухай хуулийн төслийг хэлэлцэн дэмжээд парламентын чуулганд өргөн мэдүүлэхээр тогтов. Хуульд “дугаартайгаа шилжих үйлчилгээ”-г Монгол Улсад нэвтрүүлэх тухай хэсэг, заалт нэмэхээр боловсруулсан байна. Уг нэмэлт, өөрчлөлт нь Монгол Улсын Үндсэн хууль болон бусад хууль тогтоомжид нийцэж байгаа тул ямар нэг хуулийг нэмж өөрчлөх юм уу хүчингүй болгох шаардлагагүй аж. Дугаартайгаа шилжих үйлчилгээ гэдэгт хэрэглэгч нь цахилгаан холбооны үйлчилгээ эрхлэгч байгууллагын бүртгэлээс гарч бусад цахилгаан холбооны үйлчилгээ эрхлэгчээр бүртгүүлэх үедээ одоо ашиглаж буй дугаараа хадгалж үлдэх боломж олгох үйлчилгээ аж. Үүрэн холбооны хэрэглэгч нь үйлчилгээ эрхлэгчийг чөлөөтэй сонгох боломжтой ч урьд ашиглаж байсан дугаараа зайлшгүй солих шаардлага гардаг. Харин дугаартайгаа шилждэг болсноор үүнийг шийдвэрлэх гэнэ.
Ингэснээр оператораа сольж буй хэрэглэгч бусдад дугаараа шинээр хэлэх, нэрийн хуудсаа солих шаардлагагүй, илүү чанартай үйлчилгээ авах үр дүнтэй гэж үзжээ.