Буудлагын спортын дэлхийн цомын цуврал тэмцээнүүдийн нэг Словени улсын Марибор хотноо болж өнгөрлөө. Тус тэмцээнээс олимпын мөнгөн медальт, гавьяат тамирчин О.Гүндэгмаа мөнгөн медаль хүртлээ. Тэрээр өнгөрсөн долоо хоногт Германы Мюнхен хотноо болсон Дэлхийн цомын цувралаас алтан медаль хүртэж, 2016 оны олимпын эрхийн төлөөх тэмцээнүүдээ амжилттай эхлүүлсэн.
Энэ удаагийн цувралд манайхаас гавьяат тамирчин О.Гүндэгмаа болон ОУХМ Э.Даваахүү нар мордож, 25 метрийн спорт гар буу, 50 метрийн сонгомол гар бууны төрөлд өрсөлдсөн юм. Тэд маргааш 10 метр хийн гар бууны төрөлд буудна.