Английн шигшээ багийг нэгэн цагт ахалж явсан, одоо хөлбөмбөгийн нэртэй тайлбарлагч болоод буй Гари Линекер улсынхаа багийг өмнөх тоглолтуудаасаа огтхон ч айх хэрэггүй хэмээн зоригжуулж байна. Италид 2:1-ээр хожигдоод байгаа тэд одоо Уругвайтай тоглоно. “Хэдийгээр үр дүн нь тааруухан гарсан ч гэлээ Италийн эсрэг манайхан сайн тоглосон. Тиймээс айх шаардлага огтхон ч байхгүй.  
Италитай яаж тоглосон, түүн шигээ байхад л хангалттай” гэж Г.Линекер зөвлөжээ. Италид хэдий хожигдсон ч тэр тоглолт дахь Английн багийн статистик үзүүлэлтүүд маш сайн байсан учраас Гари Линекер ийм итгэлтэй байгаа аж. Англичуудын их зүйл хүсэн хүлээж байсан Рүүнигээс хангалттай тоглолт гараагүй учир дараагийн удаа түүний байрлалыг солих тухай яриа гараад байна. Рахим Стерлингийг Уэйн Рүүнигийн оронд тоглуулна гэсэн сураг аль хэдийнэ гарч, Стерлинг ч дуртайяа энэ байрлалд тоглоход бэлэн гэдгээ мэдэгджээ.