Бразильд болж байгаа хөлбөмбөгийн дэлхийн аварга шалгаруулах тэмцээнд Коста-Рикийн шигшээ баг Италийн багтай тоглож 1:0 харьцаагаар хожсоны дараа Олон улсын хөлбөмбөгийн холбоо-ФИФА эдний долоон тамирчныг сэргээшийн шинжилгээнд оруулах шийдвэр гаргасан байна.

Харин Коста-Рикигийн хөлбөмбөгийн холбооны ерөнхийлөгч Адрин Гутьеррес ФИФА-гийн энэ шийдвэрт  сэтгэл дундуур байгаагаа илэрхийлж “Бид  энэ шийдвэрт хүндэтгэлтэй хандаж шинжилгээг өгнө. Гэхдээ яагаад нэг дор долоон тамирчныг шинжилгээнд оруулж байгаа талаар Олон улсын хөлбөмбөгийн холбооноос  тайлбар шаардаж байна.
Манай тамирчдыг хориотой эм бэлдмэл хэрэглэдэг хэмээн хардаж байгаа нь ойлгомжтой байна. Бид 4, 8, эсвэл бүр 23 хөлбөмбөгчөө сэргээшийн шинжилгээнд оруулахад бэлэн байна. Өөр нэг зүйл бол ийм шинжилгээг хэзээ ч авч болох байтал заавал тэмцээн дуусмагч авч байгаа нь бүр сонин байна” гэжээ.