Манай  оронд айлчилж байгаа ОХУ-ын Холбооны хурлын Холбооны зөвлөлийн дарга Валентина Ивановна Матвиенко Монгол Улсын Их хурлын дарга З.Энхболдтой өчигдөр хэлэлцээ хийхэд уг хэлэлцээрт оролцох ёстой байсан УИХ-ын гишүүн эрхэм түшээд өчнөөн олон минутаар хоцорч булайгаа дэлгэлээ.
УИХ-д МАН-аас сонгогдсон С.Бямбацогт, Д.Сарангэрэл, Д.Оюунхорол нар хэлэлцээ нэгэнт эхэлчихсэн хойно орж ирээд хүлцэл өчих ч үгүй хэнэггүй царайлан суудалдаа сууцгаалаа.  Харин УИХ-ын дарга З.Энхболд тэдний өмнөөс хүндэт зочдоосоо уучлал гуйж харагдсан.
Монгол төр, УИХ, ер нь Монгол улсын хөгжил цэцэглэлийн эсрэг хэл амаа билүүдэж, эрх баригчдыг муу хэлэх, хэн нэгнийг огцруулах болбол нэг ч хүн үлдэлгүйгээр бараг л цагаасаа өмнө ирээд сууж байдаг МАН-ын эрхэм гишүүд умард их хөршийнхөө төрийн өндөр албан тушаалтныг үл хүндэтгэв үү, хоёр орны харилцаа хамтын ажиллагааг хөгжүүлэх сонирхолгүй байв уу, юутай ч бөөнөөрөө бойкотолж цаг хоцрон эсэргүүцлээ илэрхийллээ.
Тэднийгээ УИХ дахь МАН-ын бүлгийн дарга, нүдэнд нь сайн зүйл огт харагдахаа больж гагц шүүмжлэхийн одонд төрсөн С.Бямбацогт нь зохион байгуулалттайгаар  дагуулан ийн хойш суусан бололтой.