Бразильд болж байгаа хөлбөмбөгийн дэлхийн аварга шалгаруулах тэмцээний хагас шигшээ тоглолтод учраа таарсан Бразиль-Германы шигшээ багийн тэмцээн өнгөрсөн шөнө болж германчууд дэвжээний эзнийг 7:1-ийн харьцаагаар буулган авч хөгжөөн дэмжигчдийг гайхшрууллаа.

Тоглолт эхлэхээс өмнө Бразилын шигшээ багийн од Неймар гэмтэл авч, багийн ахлагч Тиагу Сильва торгуулийн улмаас талбайд гараагүй ч бразилчууд дэвжээн дээрээ ялна гэж найдаж байсан.
Германчуудын хувьд долоон гоолынхоо салхийг тэмцээний 11 дэх минутад Томас Мюллер булангаас Тони Кроосын  дамжуулсан бөмбөгийг айлын хаалганд хийж  тэр дэлхийн аваргын дэвжээнд энэ жил зургаа дахь бөмбөгөө оруулж  хамгийн шилдэг гоолч боллоо.
Харин тэмцээний   23 дахь минутад Мирослав Клозе, 24, 26 дахь минутад Тони Кроос, 29 дэх минутад Сами Хедира гоол орууллаа. Солилцоогоор гарч ирсэн Андре Шюррле зургаа дахь бөмбөгийг тэмцээний 69 дэх минутад оруулснаар немцүүд энэ тэмцээнд хожих нь гарцаагүй боллоо. Дахиад 10 минутын дараа дахин нэг бөмбөг.
Ийнхүү Германы шигшээ баг дэлхийн хөлбөмбөгийн аварга шалгаруулах тэмцээний алтан медалийн төлөө тоглох эрхтэй боллоо.
Хөлбөмбөгийн дэлхийн аварга шалгаруулах тэмцээний хагас шигшээгийн дараагийн тэмцээн долдугаар сарын 10-ны өглөөгүүр Аргентин, Нидерландын шигшээ багийн хооронд болно.
Энэ хоёр багийн хожсон нь Германы шигшээ багтай алтан медалийн төлөө тоглоно. Харин хожигдсон баг нь Бразилын багтай хүрэл медалийн төлөө тоглох юм.

Дэлхийн аваргын алтан медалийн төлөөх тэмцээн долдугаар сарын 13-нд болно.
Германы шигшээ баг хөлбөмбөгийн дэлхийн аварга шалгаруулах тэмцээнд гурван удаа түрүүлж байсан юм.