Хөлбөмбөгийн түүхэнд бичигдэх маш сонирхолтой тоглолт хэдхэн цагийн өмнө болж, Германы шигшээ баг ДАШТ-ийг зохион байгуулагч Бразилийн шигшээг 7:1-ээр бут ниргэлээ. Ийм олон гоолын зөрүүтэй хожигдож үзээгүй бразильчуудын хувьд тэнгэр ниргэх шиг болж байгааг, энэ сэтгэлзүй нь ч эсрэг багтаа ээлж дараалан гоол оруулахад хүргэсэн гэдгийг Германы дасгалжуулагч Иохим Лёв тоглолтын дараа мэдэгджээ. “Ердөө дөрвөн минутын дотор гурван гоол оруулж орхисон нь талбайн эзэн багийг шоконд оруулсан. Тэд үнэхээр балмагдаж байгааг бид мэдэрч, энэ давуу талыг ч ашигласан” хэмээн тэрээр ярьсан юм.
Үнэхээр энэ тоглолт хөлбөмбөгийн түүхэнд үлдэх олон сонирхолтой рекордыг тогтоолоо. Тухайлбал,
-Тоглолтын эхний хагаст таван гоол орсны дөрмийг зургаахан минутын дотор оруулсан.
-Тоглолтын хоёр дахь болон дөрөв дэх гоолын хооронд ердөө 179 секунд өнгөрсөн.
-Тоглолтын эхний 29 минутанд Герман 5-0-оор өрсөлдөгчөө тэргүүлсэн нь дэлхийн аваргын түүхэнд аль ч багийн үзүүлээгүй амжилт. Өөр ямар ч баг ийм богино хугацаанд ийм олон гоол оруулж байсангүй.
-Одоо Германы шигшээ багийн ДАШТ-доруулсан гоол 223 болж, Бразилиас илүү гараад байна.
-Германы тоглогч Мирослав Клозе 16 дахь гоол хийснээр бүх цаг үеийн ДАШТ-д хамгийн олон гоол оруулсан мэргэн бууч боллоо.
-ДАШТ-ийн хагас шигшээд долоон оноо авсан анхны баг нь Герман боллоо.

Дасгалжуулагчийнх нь хэлснээр Герман үнэхээр азтай байлаа. Томас Мюллер тэмцээний дараа хэлэхдээ “Мэдээж, бид ийн оноогоор хожих тухай огтхон ч төсөөлөөгүй. Эндээ тоглолт хэрхэн өөрөөр явагдаж болохыг харж болно” гэсэн юм.