Ирэх есдүгээр сард Өмнөд Солонгост болох Азийн наадамд Умард Солонгос урьд урьдынхаасаа олон тамирчин, хөгжөөн дэмжигч илгээнэ.
Түр эвлэрлийн гэрээ байгуулж байсан хоёр Солонгосын хилийн цэрэггүй бүсийн "Панмүнжом" тосгонд өчигдөр хоёр Солонгосын албаны хүмүүс уулзаж, спортын энэ арга хэмжээнд Умард Солонгос хэрхэн оролцох тухай хэлэлцжээ.
Өмнөд Солонгосын Улс орноо нэгтгэх яамны мэдэгдсэнээр, Умард Солонгос 350 тамирчнаа ирэх есдүгээр сард Инчон хотод болох Азийн наадамд оролцуулахаар төлөвлөж байна. Мөн ижил тооны хөгжөөн дэмжигчид илгээх аж.
“NHK” телевизийн Сөүл дэх сурвалжлагчийн мэдээлснээр, үндэстэн угсаатны харилцаа холбоог онцлох замаар БНАСАУ Өмнөд Солонгостой хоёр талын харилцааг сайжруулахыг хүсэж байгаа нь илэрхий байна.
Гэхдээ улсынхаа талаарх Өмнөд Солонгосын байр суурийг Умард Солонгосын төлөөлөгчид шүүмжлэн гарч явснаар өчигдрийн хэлэлцээ зогсжээ. одоогоор талууд дараагийн уулзалтыг хэзээ хийхээ ч товлож чадаагүй байна.
