Хүн бүр өөрт оногдсон үүрэг, даалгавраа хариуцлагатай, нямбай хийчихдэг бол энэ улс мөн ч хурдан хөгжинө дөө гэдэг үг хэдэнтээ сонсч байв. Иргэд ийм үг хайлж, санаа алдахад хүргэснээс үзэхэд оноож, хүлээсэн үүрэгтээ л төвлөрч ажилладаг хүн ховор байдаг бололтой. Ажаад байхад ийм дутагдал жирийн албан хаагчдаас авахуулаад төрийн өндөр тушаалтай сайдад хүртэл байна. Засгийн газар, УИХ-ын гишүүн, Эдийн засгийн хөгжлийн сайд Н.Батбаяр бол Засгийн газартаа ийм шинжээрээ онцгойрно. Уг нь, Шинэчлэлийн Засгийн газар байгуулагдаж, шинээр Эдийн засгийн хөгжлийн яам байгуулж байхдаа бодлого тодорхойлох юм шүү гэж захиж, зааж, зөвлөж, баталж байсан гэдэг.

Н.Батбаяр ч “Жаа” гэж ирээд л сайд болоо биз. Гэтэл тэрээр тамгаа атгаж, эрхэнд гармагцаа л онцолсон ажлаа умартаж бодлогоос бусдыг нь ярьж эхэлсэн. Жишээ нь, бонд.  “Чингис” бондын 1.5 тэрбум ам.долларын зарцуулалтыг тэр хянаж суух болсон. Бондын сайд үргэлжлүүлээд Зам, тээврийн сайдын дүрд хувилсан. “Гудамж” төсөл хэрэгжүүлж, 33 уулзвар шинэчилэхээр ханцуй шамлан дайрсан нь өнөө ч дуусаагүй, үргэлжилсээр. Харамсалтай нь, “Гудамж” төслийн гүйцэтгэлийн явцад 50 тэрбум төгрөгийн  “но” гарч, хэргийн эзэн нь олдохгүй манаргаж яваа. Өнгөрсөн зун ердөө Улаанбаатарын зам талбайг засч ажиллаад байхаар нь Нийслэлийн бие төлөөлөгч сайд гэж харах хүн ч байлаа. Харин энэ жилээс орон нутаг, аймгийн төвийн замын уулзвар шинэчилдэг болсон.

Хамгийн сүүлд сураг сонсоход Гадаад харилцааны сайд Л.Болдын ажлыг өмнүүр нь ороод хийж яваа сурагтай. Тодруулбал, удахгүй өмнөд хөршийн төрийн тэргүүн, бусад албан тушаалтнууд айлчилна. Уг айлчлалд зориулсан бэлтгэл ажлыг хангахаар Н.Батбаяр сайд гүйж яваа гэнэ. Мэдээж хөрш оронтой найрсаг харилцаатай байх нь монголчуудад ашигтай, ялангуяа эдийн засгийн хамтын ажиллагааны хувьд илүү чухал байж болох. Гэвч... Бүхэл бүтэн Гадаад харилцааны яам гэдэг субъектыг ажилгүй болгож буй сайдад эдийн засгийнхаа хөгжлийг даатгачихсан Монгол Улсыг хөгжлийн салхи үлээх эсэхийг онгод тэнгэр л мэдэх биз ээ.