“Инвест Монголиа-2014” хөрөнгө оруулагчдын чуулга уулзалтыг зохион байгуулагч “Фронтиер конференс” ХХК-ийн захирал Маса Игатагаас гадаадын хөрөнгө оруулагчдын Монголд орж ирэх сонирхол ямар байгаа талаар тодруулсан юм.  

-Гадаадын хөрөнгө оруу­­лагчид Монголын эдийн засгийг өнөөдөр хэр­хэн дүгнэж байгаа вэ?
-Хөрөнгө оруулагчид энэ жил Монголын эдийн засаг унасан тул хөрөнгө оруулалт хийхээс татгалзаж, үр өгөөжгүй байх болов уу гэж дүгнэж байна. Тухайлбал, Монголын эдийн засаг энэ оны эхний хагас жилд таван хувиар л өссөн байсан.
Сүүлийн хагас жилд бараг өсөхгүй гэсэн төсөөлөл бий. Гэвч ирэх жилээс эдийн засаг  сайжрах байх гэж найдаж байгаа.  Сайжирвал хөрөнгө оруулалт нэмэгдэнэ. Оюу толгойн далд уурхайн хөрөнгө оруулалт энэ онд багтаж шийдэгдвэл Монголын эдийн засаг хямралаас гарч хөл дээрээ босоод ирэх байх. Гэтэл энэ асуудлаа ший­дэхгүй Хятадаас мөнгө гуйж, эдийн засгаа сэргээх найдвар тавьж буй юм. Энэ бол буруу. Дотоодын томоо­хон төслүүдийн хөрөнгө оруулал­таа л нэн яаралтай шийдэж байж амжилтад хүрнэ.
 
-Жил бүр хөрөнгө оруулагчдын ийм чуулган зохион байгуулж байна. Үүний бодит үр дүн хэрхэн хөрсөнд бууж байна вэ. Ер нь, энэ чуулганы нөлөөгөөр хэдий хэмжээний хөрөнгө оруулалт Монголд орж ирсэн гэж та үзэж байна вэ?
-Хөрөнгө оруулалт бол яг гэрлэлт шиг зүйл. Өөрөөр хэлбэл хөрөнгө оруулалт хийлээ гээд эдийн засаг төдөн хувиар өслөө гэж бид тооцож чадахгүй. Бид Монголыг гадаадын хөрөнгө оруулагчидтай холбох үүрэг­тэй ажиллаж байна. Энэ хурлаас гарсан үр дүнг бодитоор тооцох аргагүй юм.

-Манай улсын эдийн засгийн аль салбарыг хө­рөнгө оруулагчид илүүтэй сонирхож байна вэ?
-Урд нь ашигт малтмалын үнэ өсч ирсэн 2011 он хүртэл уул уурхайн салбарыг хөрөнгө оруулагчид илүү их сонирхож байсан. Ингээд  зөвхөн уул уурхайг сонирхоод алдагдал хүлээсэн хөрөнгө оруулагч олон бий. Иймд  өнөөдөр эрүүл мэнд, боловсрол, хөдөө аж ахуй, үл хөдлөх хөрөнгийн зах зээл зэргийг хамгийн их сонирхож байгаа юм. Нэг ёсондоо Монголд хөрөнгө оруу­лах салбар нь өргөжин тэлж  байна гэсэн үг. Хөдөө аж ахуйн салбарыг аваад үзвэл Монголд түүхий эд нь бий. Үүнийгээ боловсруулж ашиглаад брэнд бүтээгдэхүүн үйлдвэрлэх боломжтой. Гэвч  энэ түүхий эдээ ашиглаж бүтээг­дэхүүн үйлдвэрлээд экс­портод гаргахад цаг хугацаа нэлээд шаардана. Энэ жилээс эхлээд хөдөө аж ахуйн сал­барт хөрөнгө оруулах сонир­хол илт давамгайлж байна. Ирэх 5-10 жилд хөдөө аж ахуйн салбарт нэлээд хөрөнгө оруу­лалт орж ирж хөгжих  дүр зураг ажиглагдаж байгаа юм.

-Сүүлийн жилүүдэд япо­­­нчууд Монголыг их со­нирхдог болсон. Одоо­гоор Японоос хэдий хэмжээний хөрөнгө оруулалт орж ирээд байна вэ?
-Монгол Улсын Ерөнхий­лөгч Японд айлчлахдаа 600 гаруй хөрөнгө оруулагчтай уулзалт хийсэн. Үүний үр дүн болон хууль эрх зүйн орчин сайжирсан тул хөрөнгө оруулалт нэмэгдэх байх. Одоогоор томоохон хэмжээний хөрөнгө оруулалт хараахан орж ирээгүй байна.