Украины асуудлаас болж Европын холбооноос Оросын эсрэг тавьсан хоригийн хүрээнд ОХУ-ыг Олон улсын хөл бөмбөгийн холбоо /ФИФА/ болон Европын хөлбөмбөгийн холбоо /УЕФА/-гийн  гишүүнчлэлээс хасч магадгүй байна. Ийм баримт бичгийн төсөл Брюсселлээс Чехэд ирснийг эх сурвалж нотолж байна.
Энд Европын холбооны гишүүн орнууд Оросыг Олон улсын спортын хэд хэдэн байгууллагын гишүүнчлэлийг зогсоох тухай тусгажээ. Ингэснээр ОХУ хөлбөмбөгийн дэлхийн аварга шалгаруулах тэмцээнд болон Европын хөлбөмбөгийн холбооны зохиодог тивийн аварга шалгаруулах, лигийн тэмцээнүүдэд оролцох боломжгүй болох юм.
Харин оросуудын хувьд энэ талаар өөр байр суурьтай байна. ОХУ-ын Спортын сайд Виталий Мутко “Олон улсын хөл бөмбөгийн холбоо, Европын хөл бөмбөгийн холбоо бол засгийн газрын бус байгууллага. Европын холбоо гэхэд л зөвхөн энэ тивийн орнуудыг хамардаг. Тэгэхээр ийм зүйл байж таарахгүй” гээд Оросыг ФИФА, УЕФА-гаас хасахгүй байх гэдгээ илэрхийлжээ.
Оросын лигийн холбооны гүйцэтгэх захирал Сергей Чебан ч бас “Миний байр суурь тодорхой, хөл бөмбөг бол ард түмнийг нэгтгэдэг зүйл, улстөртэй ямар ч холбоогүй. Эртний Грект олимпын үеэр дайныг зогсоодог байсан сонгодог жишээг  бид мэднэ. Хөлбөмбөгийн ачаар бид европтой дэлхийтэй улам ойртон нягтардаг. Ийм зүйлийг тасалдуулах гэж байгаа хүмүүст би харамсч байна” гэжээ.