Өмнөд Африкийн Дурбан хотноо энэ сарын 20-29-ны өдрүүдэд болсон шатрын өсвөрийн дэлхийн аварга шалгаруулах тэмцээний охид, хөвгүүдийн найман насанд манай хоёр тамирчин алт, мөнгөн медаль хүртлээ. Хос медалийг эх орондоо авчирч буй бяцхан тамирчид маань Д.Мөнхзул, Е.Төгстөмөр хоёр юм. Д.Мөнхзул охидын найман насны ангилалд түрүүлж алтан медалийн эзэн болсон бол Азийн аварга, Дэлхийн сурагчдын аварга, “Чингис Майнинг Групп”-ийн тамирчин, дэлхийн шатрын холбооны дэд мастер Е.Төгстөмөр мөнгөн медаль хүртсэн байна.

Тэмцээнд 90 орны 1000 орчим охид хөвгүүд 8-18 насны ангилалд оюун ухаанаа сорин өрсөлдсөнөөс найман настай Е.Төгстөмөр өөрийн ангилалдаа 64 шатарчинтай өрсөлдөж 11 өргийн дараа найман хожил, гурван тэнцээгээр 9,5 оноо авснаар дэд байр эзэлжээ. ОХУ-ын Илия Маковеев (1799) Е.Төгстөмөртэй(1612) оноо тэнцсэн ч коэффициентийн зөрүүгээр дэлхийн аварга цолыг хүртсэн ажээ.

Харин охидын найман насанд 51 шатарчнаас Даваахүүгийн Мөнхзул найман хожил, нэг тэнцээ, хоёр хожигдолтойгоор 8.5 оноогоор алтан медаль хүртсэн байна. Энэ ангилалд  Вьетнамын Лу Ха Би Нго (8,5 оноо), Туркменистаны Езизова (8.0 оноо) мөнгө, хүрэл медаль тус тус авчээ.
Ийнхүү Е.Төгстөмөр, Д.Мөнхзул нар Монголын шатрын түүхэн дэх шинэ рекордуудын эзэд болж байна. Өмнө нь олон удаа тэмцээн уралдаанд түрүүлж монголчуудыгаа баярлуулж байсан Е.Төгстөмөр хүүгийн тухайд Монголын эрэгтэй шатарчдаас хамгийн бага насандаа дэлхийн аваргын тэмцээнээс мөнгөн медаль хүртэж байна.

 Тэрээр хамгийн зургаан насандаа Азийн аварга, долоотойдоо сурагчдын дэлхийн аварга, мөн насандаа дэлхийн шатрын холбооны дэд мастерын цол авч байсан билээ.
Д.Мөнхзулын хувьд мөн адил Монголын эмэгтэй шатарчдаас хамгийн бага насандаа буюу долоотойдоо шатрын дэлхийн аварга гэсэн эрхэм дээд цолны эзэн болж байгаа юм.
Энэ удаагийн ДАШТ-д Монголын есөн тамирчин оролцсоноос хоёр нь Канад улсын нэрийн өмнөөс оролцсон байна.