“Хүсэл зорилгоо нэгтгэе" хөдөлгөөн, МАН-ын “Шинэчлэлийн хороо” Ерөнхий сайд Н.Алтанхуягтай хариуцлага тооцох тэмцэлд үзэл санаа, үйл хэргээ нэгтгэн хамтран ажиллахаар болж, өнөөдөр санамж бичигт гарын үсэг зурлаа.

Тэд Шинэчлэлийн Засгийн газрыг иргэдийн амьдралыг доройтуулж, худалдан авах чадварыг огцом бууруулсан, иргэдээ ажилгүй, орлогогүй болгож ядууруулсан, эдийн засгийг бүрэн хямруулж, хөрөнгө оруулалтыг зогсоосон, бизнесийн салбарыг унагаж, аж ахуйн нэгжүүдийг дампууруулж, валютын ханш өсч, бараа бүтээгдэхүүний үнийг нэмэгдүүлсэн, улс орныг өрийн дарамтад бүрэн автуулсан, төсвийн орлогыг тасалдуулж, төрийн албыг данхайлгасан гэх зэрэг 12 үндэслэлүүдээр буруутгаж байгаа юм байна. Энэхүү үндэслэлийнхээ хүрээнд Ерөнхий сайдад хариуцлага тооцох улс төрийн тэмцэлд ард нийтийг уриаллаа.