Монгол Улсын гурав дахь Ерөнхийлөгч асан Намбарын Энхбаяр БНСУ-аас Улаанбаатарын цагаар 22 цаг 30 минутад Чингис хаан Олон улсын нисэх буудалд газардлаа.

Тэрээр хорихоос суллагдсаныхаа дараа БНСУ- ыг зориод бараг жил гаруйн хугацаанд эмчилгээ хийлгэж байгаад ийнхүү эх орондоо ирээд байгаа билээ. Эмчилгээнд явахдаа түүний бие ихэд ядарч, турж эцэн "жингийн алдагдал, эсийн задрал” гэсэн оноштой байсан юм.

Өнгөрсөн хугацаанд Н.Энхбаярыг ирэх гэж байна гэсэн мэдээлэл хэд хэдэн удаа хэвлэлээр цацагдсан ч намын нөхөд нь тухай бүрт нь хэвлэл мэдээллийнхэнд ташаа мэдээлэл болохыг хэлж байсан. Түүгээр ч зогсохгүй ноён Н.Энхбаярыг БНСУ-ын иргэншилтэй болох хүсэлт гаргасан талаар Монголын төдийгүй Солонгосын хэвлэл мэдээллээр шуугиад авсан. Зарим нэг учир мэдэх хүмүүсийн хардсан яриагаар Н.Энхбаяр нутагтаа ирэхийн өмнө ийн шуум тарьж өрсөлдөгч намынхан тэр дундаа тэдгээр намын лидрүүдийн захиалгаар хийсэн ажил мэт харагдуулж өөрийгөө өрөвдүүлэх гэсэн башир арга гэх нь ч байна. Гэвч тэрээр намын нөхдийнхөө адил эрс үгүйсгэсэн юм.

Биднийг очиход түүний хүү Э.Батшугар болон намын нөхөд, ойр дотныхон нь түүнийг угтаж авахаар нисэх онгоцны буудалын VIP танхимын үүдээр дүүрсэн байлаа. Удалгүй Н.Энхбаяр эхнэрийн хамт гарч ирж хэвлэл мэдээллийнхэн ч бүчин авч дор бүрнээ асуулт тавьцгаасан. Ингээд олныг нуршилгүй түүний нутагтаа ирсэн анхны сэтгэгдлийг хүргье.

Н.Энхбаяр: Монголын салхиа их саналаа

-Сайн явж ирэв үү?
-Сайн явж ирлээ.

-Таны биеийн байдал ямар байгаа вэ, эмчилгээгээ дууссан уу?
-Би одоо эмчлүүлж байгаа. Сая эмчилгээнээсээ чөлөө аваад ирсэн байгаа. Биеийн байдал дээрдэж байна.

-Та нутагтаа хэр зэрэг удах вэ. Эх орондоо ирэхдээ ямар нэгэн айдас түгшүүр агуулж ирэв үү?
-Тодохой хугацаагаар байж байгаад. Эргээд эмчилгээндээ явна аа. Угаасаа айх гэдэг юм аль хэдийн алга болчихсон хүн учраас ямар нэгэн юмнаас айхгүй байна. Харин хамгийн сайхан сэтгэгдэлтэй байна. Би өнөөдөр ямар нэгэн муу юм санаж ирсэнгүй. Дотроо хэн нэгэнд гомдсон зүйл ерөөсөө агуулсангүй. Тэр тусмаа хол байхад бүгдээрээ сайхан санагддаг юм байна. Энд байхаар тэр ч болохгүй юм шиг, энэ ч болохгүй юм шиг санагддаг үе байсан. Гэтэл хүний газарт эмчлүүлээд байж байхад энд байгаа хүн бүр маань сайхан санагдаж байлаа. Ер нь тэгээд тэнд байхдаа монголчуудаа маш их саналаа. Монголчууд маань ямар ч солонгос, хятад хүнээс илүү сайхан ажиллаж амьдарч чадна аа. Ард түмэн, улс орноо л их саналаа. Монголын салхиа их саналаа, өөр хаана ч байхгүй ийм сайхан цэвэр агаараа саналаа.

-Таныг ирэхээс өмнө Солонгосын хэвлэл мэдээллээр иргэншлээ солих гэж байгаа талаар мэдээллэж байсан?
-Тэр бол ямар ч эрүүл саруул ухаантай хүний санаанд байж боломгүй зүйл. Тийм учраас би тийм зүйл ярьж та бүхнийхээ цаг завыг гарздаад яах вэ. Яаж тийм юм байхав дээ. Солонгосын хэвлэл мэдээллийнхнээс сураглахад Монголоос тийм мэдээлэл авсан гэж хариулж байна лээ. Тэгэхээр манай монголчууд л тийм буруу мэдээлэл өгсөн юм билээ. Яагаад тийм мэдээлэл өгсөн юм мэдэхгүй. Солонгосуудын өмнө монголчууд маань жаахан ичмээр байдалд орлоо доо.

-Танд дахиад эрүүгийн хэрэг үүсгэсэн гээд байгаа?
-Монголчууд минь ээ ингээд л дандаа эрүүгийн хэрэг яриад байх хэрэггүй ээ. Яахав хэвлэл мэдээллийнхэн та бүгдэд бол сонин байх л даа. Миний хувьд ард түмэнтэйгээ л сайхан уулзаж байгаадаа их баяртай байна. Эрүүгийн хэргийн хувьд буруу зүйл хийсэн юм байхгүй л дээ.

-Таны эмчилгээ цаашдаа хэр удаан үргэлжлэх бол?
-Тэрийг би хэлж мэдэхгүй байна. Эмч нар л мэднэ дээ.

-Засгийн газрын бүтцийн асуудлаар намынхантайгаа ярилцах уу?
-Намынхан маань миний саналыг сонсох байлгүй дээ. Ер нь Монгол улс маань бусдаас доор орохгүй л хөгжих ёстой. Өнөөдрийн төр барьж байгаа улсууд төр бариагүй улсууд бүгдээрээ л нэгдсэн нэгэн зорилготойгоор зүтгэх хэрэгтэй.