Ерөнхий сайдыг огцруулах асуудлыг өнгөрсөн баасан гарагт Төрийн байгуулалтын байнгын хорооны баасан гарагийн үдээс өмнөх хуралдаанаар хэлэлцэх байсан ч АН-ын бүлэг завсарлага авлаа. Энэ долоо хоногийн лхагва гараг хүртэл энэ асуудлыг хэлэлцэхээргүй болж байгаа юм. АН-ын бүлгийн дарга Д.Эрдэнэбат энэ үеэр “Ерөнхий сайдыг огцруулах асуудлаар хугацаа алдаж байгаа. Овоо босгоогүй бол шаазгай юунд суух вэ гэгчээр Ардын намын хэд маань ийм санал өргөн бариагүй бол асуудал ингэж хүндрэхгүй байлаа” гэж тайлбарласан.

УИХ дахь МАН-ын бүлгийн 26 гишүүн, УИХ-ын гишүүн Л.Цог, Ж.Батзандан нар огцруулах асуудлыг өргөн барьсан. Тиймээс МАН-ын бүлгийг төлөөлж УИХ-ын дэд дарга М.Энхболд “Бид УИХ-ын гишүүнийхээ бүрэн эрхийн дагуу Ерөнхий сайдад хариуцлага тооцуулахаар өргөн мэдүүлсэн тогтоолын төсөлд ингэж хариуцлагагүй хандаж болохгүй. Асуудлыг өргөн бариад 14 хонож байгаа. Бидний өргөн барьсан бичиг бол Монголын ард түмний дийлэнх олонхийн хүсэл санаа зоригт нийцсэн зүйл. Хэд хоногийн өмнө Байнгын хорооны хуралдаанд Монголд засаглалын хямрал бий болчихлоо гэж сануулж байсан. Өнөөдөр засаглалын хямрал бодитой нүүрлэчихээд үүнийг дагаад хууль тогтоох дээд байгууллага үйл ажиллагаагаа явуулж чадахгүй болчихлоо. Төрийн байгуулалтын байнгын хорооны дарга үүнд анхаарах ёстой. Өнгөрсөн долоо хоногт З.Баянсэлэнгэ гишүүн Ерөнхий сайдыг огцруулах эсэх асуудлаас завсарлага аваад хугацаа нь дуусаад байхад Байнгын хороо асуудлаа хэлэлцэх талаар ямар ч санал санаачилга гаргаагүй. Лхагва гаригт УИХ юу ч хийгээгүй. Пүрэв гаригт УИХ төсөв дагаж орсон ганцхан асуудлыг хэлэлцсэн. Өнөөдөр /баасан гараг/ дахиад завсарлага авчихлаа. Цаана нь цаг алдахгүй ярилцаж шийдэх ёстой төсвөөс эхлээд улс орны амьдралын олон асуудал бий” гэлээ.

Мөн УИХ-ын дэд дарга Л.Цог тангараг өргөсөн УИХ-ын гишүүд ингээд сууж болохгүй гэж шүүмжлэлтэй хандаж буйгаа илэрхийлсэн.
Харин үдээс хойшхи УИХ-ын чуулганы нэгдсэн хуралдаанаар хэд хэдэн асуудал хэлэлцсэний дунд Монгол Улсын нэгдсэн төсвийн 2015 оны төсвийн хүрээний мэдэгдэл, 2016-2017 оны төсвийн төсөөллийн тухай хуульд өөрчлөлт оруулах тухай хуулийн төслүүд дэмжлэг авч чадсангүй уналаа. Энэ оны төсвийн орлогын хүлээгдэж буй гүйцэтгэл, ирэх оны макро эдийн засгийн үндсэн үзүүлэлтүүдийн төсөөлөл, гадаад болон дотоод эдийн засгийн нөхцөл байдал, экспортод гаргах эрдэс баял­гийн бүтээгдэхүүний үнэ, тоо хэмжээ зэрэг үзүүлэлтүүдээс үндэслэн 2015 оны төсвийн орлого төсвийн хүрээний мэдэгдлээс буурахаар байгаа аж. Тиймээс 2015 оны төсвийн хүрээний мэдэгдэл, 2016-2017 оны төсвийн төсөөллийн тухай хуульд нэмэлт өөрчлөлт оруулах шаардлагатайг Төсвийн байнгын хорооны дарга Ц.Даваасүрэн танил­цуулсан. Тус хуулийг төс­лүүдийг Төсвийн байнгын хороо дэмжээгүй юм. Чуул­ганы хуралдаанд оролцсон гишүүдийн олонх нь ч мөн үүнийг дэмжих боломжгүй хэмээн үзсэн. Харин үүнийг Ерөнхий сайдыг огцруулах МАН-ын бүлгийн оруулсан асуудалд АН-ын бүлгийн авсан завсарлагын хариуг нь барилаа гэж тайлбарлах нь байгаа юм.