Сүмо бөхийн насанд хүрэгчид, залуучуудын 2014 оны Монгол Улсын аварга шалгаруулах тэмцээн 11 дүгээр сарын 8-нд “Монгол бөхийн өргөө”-нд болно.

Монголын сүмо бөхийн холбоо /МСБХ/-ноос зохион байгуулах тус тэмцээний ерөнхий ивээн тэтгэгчээр “Кёкүшюү групп” ажиллаж байгаа юм. Монгол улсад сүмо бөхийг сурталчилан дэлгэрүүлэх, хүрээг нь нэмэгдүүлэх зорилготой уг тэмцээнд аймаг, дүүргийн спорт хороод болон спортын клуб, нийгэмлэгийн сүмо бөхийн баг тамирчид, сүмо бөхөөр бэлтгэл сургуулилт тогтмол хийдэг ч спорт хороо, клубт харъяалалгүй тамирчид оролцох юм.

Насны ангиллын хувьд насанд хүрэгчдийн эрэгтэй, эмэгтэй 19-өөс дээш насныхан /1995.12.31-нээс өмнө төрсөн/, залуучуудын эрэгтэй, эмэгтэй 15-18 насных /1996.01.01-1999.12.31/ байх юм. Жингийн ангиллыг сонирхуулбал, насанд хүрэгчдийн эрэгтэй: -85, -115, +115 кг, үнэмлэхүй, эмэгтэй: -65, -80, +80 кг, үнэмлэхүй, Залуучуудын эрэгтэй: -85, -100, +100 кг, үнэмлэхүй, эмэгтэй: -60, -75, +75 кг, үнэмлэхүй жинд аваргаа тодруулна.