Азийн оюутны аварга шалгаруулах сагсан бөмбөгийн эрэгтэйчүүдийн V тэмцээний хоёр дахь өдөр буюу мягмар гарагт Монгол-Тайваний тоглолт болж, 73:66 онооны харьцаагаар манай сагсанбөмбөгчид хожлоо.

Тайваний Тайпей хотноо болж буй энэ тэмцээнд 10 орон оролцож байгаагаас манай оюутны шигшээ баг БНХАУ, Тайвань, Макаотой нэг хэсэгт багтсан юм. Даваа гарагт манай баг БНХАУ-ын багт хожигдсон ч өнөөдөр талбайн эздийг хөгжөөн дэмжигчтэй нь хожлоо.

Монголын шигшээ багийн бүрэлдэхүүнд О.Цэлмэг, Б.Дархантөгс, А.Гансүх, Г.Цэнгүүнбаяр, Э.Цэрэнбаатар, О.Очирбат, Э.Дөлгөөн, Б.Батзолбоо, Г.Чинбат, Б.Тамжид, Б.Билэгт, А.Бямбадорж нар багтаж байна. Тэд бүгд 1990-1996 онд төрсөн 17-25 насны залуу тамирчид бөгөөд багийн ахлагчаар Монгол Улсын гавьяат багш Д.Гоошоохүү, багийн ахлах дасгалжуулагчаар Ж.Отгондарь, дасгалжуулагчаар Г.Өсөхбаяр нар ажиллаж байгаа юм. Мөн шүүгчээр олон улсын сагсан бөмбөгийн холбооны шүүгч Б.Ганзориг очжээ.