“АН-аас нэр дэвшиж сонгогдсон эрхэм гишүүн та Ардчилсан намын Үндсэн дүрмийг зөрчсөн үйлдэл, эс үйлдлийн аль аль нь намаас хөөх үндэслэл болдог намын гишүүний хариуцлагын дүрмийн заалтыг анхаарна уу. Та энэ хариуцлагатай цаг үед цаашид гарах үр дүнг сайтар бодож шийдвэрээ гаргана гэдэгт итгэж байна. Эс үйлдэл гэдэгт хуралдаа ирэхгүй байх явдал мөн хамаана. Ерөнхий нарийн бичгийн даргын хувьд намын их хурлыг оноос өмнө хуралдуулж, тулгамдсан асуудлыг хэлэлцэх ажлыг зохион байгуулах болно”. АН-ын ерөнхий нарийн бичгийн дарга Ц.Оюундарь УИХ-ын гишүүн М.Зоригтод өчигдөр ийм анхааруулга мэссэж явуулсныг эрхэм гишүүн сошиал ертөнцөд тавьж багаггүй шуугиан дэгдээсэн.

 Үнэхээр АН-ын үндсэн дүрмийн гуравдугаар бүлэгт

3.6. Гишүүнд шийтгэл ногдуулах.

3.6.1. Гишүүн нь үүргээ биелүүлээгүй болон Үндсэн дүрмийг зөрчсөн үйлдэл ба эс үйлдэлд журмын дагуу Хяналтын ерөнхий хороо /ХЕХ/ , дунд шатны намын байгууллагын хяналтын нэгжийн дүгнэлтийг үндэслэн шийтгэлийн аль нэгийг зохих шатны намын удирдлага ногдуулна.
3.6.1.1. Сануулах;
3.6.1.2. Намын сонгуульт албан тушаалаас огцруулах;
3.6.1.3. Улс mөрийн болон намын албан тушаалд 4 жил хүртэлх хугацаагаар нэр дэвшүүлэхгүй байх;
3.6.1.4. 3.3.3 дугаар заалтыг зөрчсөн эсвэл өөрийн нам дангаар болон хамтарч байгуулсан Засгийн Газар, сонгогдсон Засаг даргыг намын шийдвэрийг зөрчин огцруулсан нь тогтоогдвол намаас хасах гэжээ.
Хэрвээ АН-ын генсекийн анхааруулсан хийгээд намын дүрэмд зааснаар бол хамтарч байгуулсан Засгийн газрыг огцруулах кноп дарснаараа магадгүй эхлээд УИХ-ын гишүүн Х.Баттулга, Р.Бурмаа, М.Зоригт, Ж.Батзандан, Р.Амаржаргал, Д.Батцогт, Б.Наранхүү, Л.Эрдэнэчимэг нарын найман гишүүн АН-аас хөөгдөх бололтой. Харин  эс үйлдэл гаргаснаараа Шонхор фракцынхан буюу Г.Баярсайхан, Д.Ганбат, Д.Ганхуяг, С.Эрдэнэ, С.Одонтуяа, Д.Арвин мөн М.Батчимэг нарын 7 гишүүн бас л АН-аас хөөгдөх нь. Бүр нарийн ярьвал хотын дарга Э.Бат-Үүл, Д.Сосорбарам нар ч яригдаж магадгүй юм.

УИХ-д АН-аас 35 гишүүн сонгогдож, олонх болсон засгийн газраа бүрдүүлэх хэмжээнд хүрээгүй учраас Шударга ёс эвсэлтэй нэгдэж, хамтарсан Засгийн газар байгуулсныг хүн бүр мэднэ. Гэвч магадгүй АН 2012 оны сонгуулиар ард түмнээс хүлээж авсан энэ их итгэлээ үгүй хийж магадгүй болсон талаар УИХ-ын зарим гишүүн жиргэж эхэллээ.  Сошиал ертөнцөд яваа жиргээгээр АН-ын дарга, Ерөнхий сайд асан Н.Алтанхуяг “ Би биш бол хэн ч биш” гэсэн уриатайгаар өшөө авалтаа эхэлсэн гэнэ. Тэрээр УИХ-д АН-ыг цөөнх болгохын төлөө Гүйцэтгэх зөвлөлөө дүрмийн бусаар хуралдуулж, дүрмийн бус ҮЗХ хуралдуулж байна гэж үзэх хүмүүс ч цөөнгүй.

Хэрвээ АН-ын үндсэн дүрэм ёсоор бол дээрх 15 гишүүн АН-аас хөөгдөж таарах нь. Энэ нь мэдээж Илбит цурхайн тушаалаар Эмелья миний хүслээр гэгчээр одоогоор АН-ын дарга байгаа Н.Алтанхуягийн хүслээр гэсэн үг. Тэгвэл өнөөдөр УИХ-д 35 гишүүнээ суулгаж буй АН 15 гишүүнээ хасч, 20 болж цөөрнө. Н.Алтанхуягийн хүслээр 20 гишүүнтэй АН олонх болж чадахгүй учраас засгаас “татгалзаж”, сөрөг хүчний үүрэг гүйцэтгэнэ гэсэн үг.
1996 оноос хойш анх удаа олонх болсон хэмээн дэвхцэж, одоо л санаснаа биелүүлэх цаг ирлээ гэж байсан ардчилагчид маань ахиад л Засгийн гадна гарч, лааз өшиглөх хүн олшрох гэж үү...