1992 оны зургадугаар сарын 5 буюу Дэлхийн байгаль хамгаалах өдрөөр Монголд анх 15 тахь авчирч нутагшуулсан түүхтэй. Түүнээс хойш өнгөрсөн 20 жилийн хугацаанд ам бүл нэмсээр 260 гаруй тахь Хустайн нуруунд нутаглаж байна. Дэлхий дээрхи хамгийн олон тахьтай газар бол энэхүү цогцолбор газар билээ. Хятадад нийт 200 гаруй тахь байгаа хэдий ч гурван хэсэг газарт нутагладаг учраас дэлхийд хоёрдугаарт ордог байна. Сүүлийн үед монгол тахь цус ойртох аюулд ороод байгаа талаар яригдаад байгаа. Энэ талаар “Хустай цогцолбор газар” ТББ-ын захирал Н.Бандиас тодруулахад “Байгальдаа амьдарч байгаа үед цус ойртолт явагдах нь ховор. Судлаачдын тооцоолсноор бол таван хувийн цус ойртолт гарч магадгүй . Гэхдээ таван хувь бол аюултай тоо биш” гэсэн хариулт өглөө.