Жүдо бөхийн насанд хүрэгчдийн Монгол Улсын 2015 оны аварга шалгаруулах тэмцээн нэгдүгээр сарын 9-11-нд "Буянт-Ухаа" спорт цогцолборт болно.

Өнгөрсөн жил олон улс, тив, дэлхий, Азийн наадмаас нийтдээ 203 медаль хүртсэн манай жүдочид 2016 оны олимпын наадмын өмнөх жил, энэ онд “олимпын эрхийн оноо” цуглуулах хариуцлагатай тэмцээнүүд хүлээж байгаа юм. Жүдо бөхийн эрэгтэйчүүдийн улсын аварга шалгаруулах тэмцээн 1978 оноос хойш 38 дахь удаагаа зохион байгуулах гэж байгаа бол эмэгтэй жүдочдын хувьд 1993 оноос хойшхи 23 дахь улсын аварга шалгаруулах тэмцээнийг зохиож байна. Энэхүү УАШТ-д түрүүлсэн тамирчин ирж буй 2015 онд эх орноо төлөөлөн тив, дэлхийн олон тэмцээнд өрсөлдөх эрхтэй болох юм.