Спортын төв ордныг шинэчлэн барих санамж бичигт салбарын дэд сайд нь гарын үсэг зурлаа. 1958 онд БНХАУ-ын тусламжаар барьсан Спортын төв ордонд жилдээ дотоодын болон олон улс, тив, дэлхийн 140 тэмцээн зохион байгуулдаг ажээ. 8165 м.кв талбайтай, тэмцээн явуулах нэг, бэлтгэлийн долоон заал, албан тасалгаа бүхий 7700 м.кв ашигтай талбайтай тус ордны жүдо, чөлөөт бөх, бокс, хүндийн өргөлт, гимнастикийн тоноглол бүхий бэлтгэлийн зааланд үндэсний шигшээ баг болон өсвөрийн тамирчид жилдээ 7000 цагийн бэлтгэл сургууль хийдэг. Мөн спортын дунд сургууль ч үйл ажиллагаа явуулдаг. Ингээд бодохоор Спортын төв ордны байр хүрэлцээ муутайгаас гадна ашиглалтын хугацаа дуусч, газар хөдлөлтөд тэсвэргүй гэсэн дүгнэлтийг Мэргэжлийн хяналтын ерөнхий газраас хоёр ч удаа гаргасан.

Тиймээс Монголын үе үеийн тамирчдын хоёр дахь гэр болсон ордныг шинэчлэн барих ажлыг гүйцэтгүүлэхээр “Буянт-Ухаа” спортын ордныг барьсан БНХАУ-ын төрийн өмчит “Шанхай констракшн” компанитай санамж бичигт гарын үсэг зурлаа.  
Монгол Улсын Ерөнхийлөгчийн “Олимп-2040” санаачилга, Дэлхийн оюутны спортын “Универсиад 2033” их наадмыг Монгол Улсын нийслэл Улаанбаатар хотод зохион байгуулах, Засгийн газрын үйл ажиллагааны хөтөлбөрийг хэрэгжүүлэх арга хэмжээний төлөвлөгөөнд тусгасан учраас шинэ ордон зайлшгүй хэрэгцээтэй байгааг дэд сайд онцлов.
Шинээр барих Спортын төв ордон нь 50 метр усан бассейн, 2500 хүний суудалтай спорт, урлагийн төв заал, 1000 хүний суудалтай туслах заал, үндэсний шигшээ баг болон өсвөрийн тамирчдын бэлтгэл, сургууль хийх зориулалт бүхий 30 гаруй заал, спортын эмнэлэг, сургууль, бэлтгэл дасгалжуулалтад хяналт тавих лаборатор, албан тасалгаа, зочид буудал бүхий цогцолбор байх ажээ.