Төрөөс хүнс, хөдөө аж ахуйн салбарт баримтлах бодлогын талаар  өчигдөр зөвлөлдөв. Энэ онд хүн амын хэрэгцээг  55 нэр төрлийн  хүнсний бүтээгдэхүүнээр хангах бөгөөд газар тариалан болон малчдын хууль эрх зүйн орчныг шинэчлэх аж. Мөн хөрс болон зоорь агуулахыг сайжруулах юм. Үүнээс гадна тосны ургамлыг дэмжиж импорт, экспортыг сайжруулснаар дотоодын үйлдвэрлэлээ хангана.   Мөн газар тариалангийн хөрсний үржил шимийг хамгаалах зэрэг ажил хийхээр төлөвлөөд байна. Мөн эдгээр бодлогод алслагдсан аймгуудыг хамруулах юм. Манай улсын хувьд мал аж ахуйн болон газар тариаланг хөгжүүлэхдээ бүтцийн хөгжлийн бодлогыг баримталдаг. Баруун болон Зүүн бүс нутагт экспорт нэмэгдүүлэх, мал аж ахуй бус газар тариалан , зам тээвэр, агуулахын дэд бүтцийг байгуулахаар боллоо. Төрөөс хэрэгжүүлэхээр төлөвлөж буй зарим бодлогын талаар  ХХААЯ-ны Стратегийн бодлого төлөвлөлтийн газрын мэргэжилтэн С.Дивангар “Манайд эрчимжсэн мал аж ахуйг хөгжүүлэх тал дээр ихээхэн ач холбогдол өгч байгаа.  Мал аж ахуйн салбарт одоогоор цэвэр үүлдрийн арвин ашиг шимтэй  мал бага хувийг эзэлж байна. Үүнийг  одоо байгаа түвшнээс гурав дахин нэмэгдүүлэх зорилт  төрөөс гаргасан. Өнөөдөр зарим бодлого нь хэрэгжээд явж байна. Арвин ашиг шимтэй малыг оруулж ирэхэд татварын болон бусад хөнгөлөлт үзүүлж байгаа. Түүнчлэн  мал аж ахуйн үйлдвэрлэлд урьдчилан тооцоолох боломжгүй эрсдэл гарах магадлал ихтэй. Иймд  төрөл бүрийн даатгалын сан байгуулж эрсдэлийг бууруулах аргуудыг  бүрдүүлэх шаардлага гарч байна”  хэмээв.