“Нарантуул”, “Хархорин” зэрэг захад ихээр худалдаалж байгаа  хуванцар савнуудад шалгалт хийхэд 82 хувь нь хуучин,  90 орчим хувь нь хүнс хадгалахыг хориглосон сав байсан гэж МХЕГ-аас мэдээллээ. Тиймээс ус, сүү хийж болох хуванцар савыг хэрхэн таньж болох талаар МХЕГ-аас зөвлөгөө өгсөн юм. Хуванцар савны ёроолд гурвалжин дүрсэн дотор 1-7 хүртэлх тоотой тэмдэглэгээ байдаг аж.

•    1 болон 5 гэсэн тэмдэглэгээтэй савыг ахуйн нөхцөлд хэрэглэхэд аюулгүй. Ундаа, ус ургамлын тос зэргийг хийхэд зориулснаас гадна дахин ашиглах боломжтой.
•    Харин 2, 3, 4, 6, 7 гэсэн тэмдэглэгээтэй саванд ахуйн бус зүйлийг хийж хэрэглэж болно. Хүнсний зориулалтын зүйлийг огт хийж болохгүй.

Хэрвээ дээрх тэмдэглэгээг зөрчин хуванцар саванд ус, сүү, сүүн бүтээгдэхүүн хийвэл тухайн бүтээгдэхүүний химийн найрлагад ноцтой өөрчлөлт гардаг бөгөөд хар тугалга маш ихээр нэмэгддэг аж. Харин хар тугалга нь хүний нөхөн үржихүйгээс гадна мэдрэлийн тогтолцоо, зүрх судасны үйл ажиллагаанд ноцтой өөрчлөлт оруулдаг байна. Тиймээс иргэдийг хуванцар сав авах гэж байгаа бол сайн шалгаж мөн ямар ч тэмдэглэгээгүй сав авахаас татгалзахыг мэргэжилтнүүд сануулж байна. Мөн гэртээ байгаа хуванцар савны тэмдэглэгээг шалгаж үзэхийг МХЕГ-аас анхаарууллаа.