Монголбанкны Мөнгөний бодлогын зөвлөл өнөөдөр хуралдаж, мөнгөний бодлогын хүүг өөрчлөхгүй хэвээр хадгалах шийдвэр гаргажээ. Тус зөвлөлөөс гаргасан мэдэгдэлд “ Хэрэглээний үнийн индексээр илэрхийлсэн жилийн инфляц 2015 оны тавдугаар сарын эцэст 8,0 хувь, Улаанбаатар хотод 7,5 хувь болж бууран, суурь инфляц алгуур буурсаар 10,2 хувьд хүрээд байна. Нийлүүлэлтийн гаралтай инфляцын дарамт буурсан, эрэлтийн гаралтай инфляц ирэх саруудад нэмэгдэхээргүй байгаа тул 2015 оны инфляцын зорилт хангагдахаар байна.  2015 оны эхнээс төлбөрийн нийт тэнцэлд эерэг өөрчлөлтүүд гарч, оны эхний хагаст алдагдалгүй гарах нөхцөлд бүрдэж байна. Гэхдээ гадаадын шууд хөрөнгө оруулалт ДНБ-ий 1 хувиас бага болж, улсын төсвийн зардал, алдагдал нэмэгдсэн хэвээр байгаа нь мөнгөний бодлогын төлвийн зөөлрүүлэх чиглэлд өөрчлөлт оруулах боломжийг хязгаарлаж байгаа юм. Бодлогын энэхүү шийдвэр нь төгрөгийн өгөөжийг хадгалж, макро эдийн засгийн гадаад тэнцвэрийг үргэлжлүүлэн дэмжинэ” гэжээ. Монголбанкны бодлогын хүү 2014 оны долдугаар сард болон 2015 оны нэгдүгээр сард тус бүр өсч одоогоор 13 хувьтай байгаа билээ.