Автотээврийн болон өөрөө явагч хэрэгслийн албан татвар, агаарын бохирдлын төлбөр хураах ажил өнгөрсөн сарын 31-нд дууссан. Урьдчилсан байдлаар 180 мянга гаруй жолооч татвараа төлжээ. Албан татвар, төлбөрөө хуулийн хугацаанд төлөөгүй автотээврийн хэрэгсэл эзэмшигч иргэн, аж ахуйн нэгж, байгууллагын дутуу төлөлтийг барагдуулах, хариуцлага тооцох хяналтын үзлэг, шалгалтыг өнөөдрөөс эхлэн 14 хоног үргэлжлүүлэхээр болсон байна. Энэ ажлыг Замын цагдаагийн газар, татварын албад, Улаанбаатар банк хамт ран зохион байгуулах аж.

Татварын хувьд автотээврийн болон өөрөө явагч хэрэгслийн төрөл, даацын хэмжээ, цилиндрийн багтаамжаас шалтгаалан харилцан адилгүй байгаа гэнэ. Хоёр дугуйтай мотоцикль 2500 төгрөгийн татвар төлж байхад 100 тонноос дээш даацтай ачааны машин 720 мянган төгрөг төлөх жишээтэй. Харин агаарын бохирдлын төлбөр нь авто тээврийн хэрэгслийн ангилал, бензин, дизель хөдөлгүүр зэргээс хамааран 1800-9500 төгрөг төлөх юм байна.

Одоогийн байдлаар Нийслэлийн татварын газар нь нийслэлийн Замын санд жилийн эхний таван сард 9.996 тэрбум төгрөг төвлөрүүлэхээс 10.28 тэрбум төгрөгийн татварын орлого оруулж төлөвлөгөөгөө давуулж биелүүлсэн гэнэ. Хэрэв  автотээврийн болон өөрөө явагч хэрэгслийн албан татвар, агаарын бохирдлын төлбөр хураалгаагүй жолоочийг Захиргааны хариуцлагын тухай хуулийн дагуу торгоно гэдгийг ч албаныхан хэлж байна.