Энэ сарын 4-нөөс ургацаа хурааж эхэлсэн манай тариаланчид үр тарианыхаа дөнгөж хоёр хувийг хураагаад байна гэсэн мэдээ байна.
Харин төмс, хүнсний ногооны 13-17 хувийг нь хураасан гэнэ.  Өнөөдрөөс ургац хураах ажил улсын хэмжээнд бүрэн жигдэрснээр 10 дугаар сарын 15 гэхэд улсын хэмжээнд бүрэн дуусгах төлөвлөгөөтэй байгаа юм байна.  Энэ жилийн ургацын урьдчилсан балансаар таримлын болц жигд бус байгаагаас ургац хураах ажил сунжирч магадгүй гэж салбарынхан хэлж байна. ХХААЯ, мэргэжлийн байгууллагууд  тачирхан ургацыг хаягдалгүй хураах технологийн зөвлөмж гаргаж тариаланчдад хүргүүлжээ.

Өнгөрсөн хавар  511.2 мянган га талбайд тариалснаас  359.7 мянган га-д нь улаанбуудай тариалсан байна.
Ургацын урьдчилсан балансаар 265 мянган тонн үр тариа, үүнээс 252.3 мянган тонн буудай хураан авах төлөв гарчээ. ХХААЯ-ны тооцоогоор улаанбуудайн 49.9 мянган га талбайд ургац алдаж, 32.5 мянган га талбайн ургац  тэжээлд шилжихээр болжээ.  Өөрөөр хэлбэл улаанбуудай тариалсан талбайн 77.1 хувийг хурааж, төлөвлөсөн ургацынхаа 53.7 хувийг, хэрэгцээт гурилын 58.2 хувийг хангахуйц хэмжээний буудай энэ онд хураан авах юм байна. Ингэснээр нийт гурилын хэрэгцээнд 106.4 мянган тонн буудай дутах гэнэ.