Дорнод аймгийн Баяндун сумын нутагт гарсан түймрийг унтраахаар ажиллаж байгаад гал сөнөөгч аврагч таван залуу түлэгдсэнээс нэг л амьд үлдээд буй. Түүнийг эмч нар 70 хувийн түлэгдэлтэй хэмээн оношлож, амийг нь аврахын тулд Гэмтэл, согог судлалын үндэсний төвийнхөн БНСУ-д эмчлүүлэхээр шилжүүлсэн. Тус улсын Түлэнхийн төвд 10 гаруй хоног эмчлүүлж буй залуугийн бие ямар байгааг Гэмтэл, согог судлалын үндэсний төвийн ерөнхий захирал С.Отгонгэрэл “Солонгост арьс нөхөх мэс заслыг хэд хэдэн удаа хийлгэсэн. Бие нь сайжирч байгаа. Гэхдээ урт хугацааны эмчилгээ шаардлагатай” хэмээн ярьжээ.