“Улаанбаатар таймс” сонины байр буюу хуучны Сүхбаатар хэвлэх үйлдвэрийн байрыг газартай нь хамт дуудлагаар  худалдахад Абдул Карим гэх араб гаралтай Монголын иргэн 24 тэрбум төгрөгөөр авах болсон ч дараа нь татгалзсан.
Тиймээс дуудлага худалдаанд Абдулын дараах буюу 23 тэрбум 850 сая төгрөгийн үнэ хэлсэн “Таван богд” группын захиралд Ц.Баатарсайханд уг газрыг худалдан авах эрх нь шилжиж буй юм. Нийслэлийн Өмчийн харилцааны газраас Ц.Баатарсайхан захиралд уг газрыг худалдан авах санал хүргүүлсний хариуг өгөх хугацаа өнөөдрөөр дуусч байгаа юм.
“Таван богд” группын захирал Ц.Баатарсайхан өөрийн төлөөлөгчөөрөө дамжуулан дараах хариу өгсөн байна.
-Хуучны хэвлэх үйлдвэрийн барилгын эргэн тойрон дахь газрыг Хас банк болон Таван богд групп эзэмшдэгийг хүмүүс сайн мэднэ. Тиймээс бид уг газрыг эзэмших эрхийг шилжүүлэн авахаар шийдсэн. Бид газрыг аваад хэвлэх үйлдвэрийн байрыг 1929 оных нь тэр л түүхэн дурсгалт байдлаар нь сэргээн засварлаж, GALLERIA ULAANBAATAR нэртэйгээр худалдаа,  үйлчилгээний төвийг нээн ажиллуулахаар төлөвлөөд байгаа.  Бид  Төрийн ордныхоо зэргэлдээ Төрийн ордноосоо өндөр байшин босгохгүй гэсэн байр суурьтай байгаа. Тиймээс ч хэвлэх үйлдвэрийн барилгыг хуучин хэв загварыг нь алдагдуулахгүйгээр хадгалах шийдвэрт хүрсэн. Энэ төвд маань Улаанбаатар хотын музей  “Говь” ХК-ийн нэрийн дэлгүүр, банк, япон, монгол зоогийн газар, автомашины үзүүлэнгийн танхим, дэлхийд алдартай брэндүүдийн бутик дэлгүүр, үйлчилгээний салбарууд байрлах юм гэжээ.