Японы ядуурлыг бууруулах сангийн санхүүжилтээр ЭМЯ, Азийн хөгжлийн банктай хамтран хэрэгжүүлж буй  “Бага насны хүүхдийн хоол тэжээлийн архаг дутагдлыг бууруулах” төслийн хүрээнд “ГУМ” ХХК-нд хэрэгжиж байгаа “Д аминдэмээр баяжуулсан сүү” загвар төслийн хэрэгжилтийн үр дүнг өнөөдөр хэлэлцэв. Төслийн гол зорилго нь Д аминдэмээр баяжуулсан сүү үйлдвэрлэж, бага насны хүүхдийн хоол тэжээлд хэрэглэснээр рахитаас урьдчилан сэргийлэхэд оршиж буй юм. Өнөөдрийн байдлаар төсөлд тусгагдсан үйл ажиллагааны хэрэгжилт 67 хувьтай гарчээ. Төслийн үйл ажиллагааг Чингэлтэй дүүргийн долдугаар хорооны “Таны-Итгэл” өрхийн эмнэлэгтэй хамтран тус хорооны 30 өрхийн хүүхдүүдийг сонгож, баяжуулсан сүүг 9-36 сартай 30 хүүхдэд хоногт 200 грамм хэмжээтэйгээр уулгаж, эцэг эхчүүдэд нь төслийн талаар танилцуулга хийсэн байна.