Пакистан улсын “Лалын үзэл суртлын зөвлөл” гэсэн байгууллагаас нөхөр нь эхнэрээ сахилга батын арга хэмжээ авах үүднээс аядуу зөөлнөөр  зодохыг зөвшөөрсөн хууль санаачилсан байна. Лалын үзэл суртлын зөвлөл буюу  “CII” гэсэн байгууллага нь лалын шашинтай холбоотой хууль журам батлахтай холбогдуулан парламентад зөвлөгөө өгдөг Үндсэн хуулийн байгууллага аж.

 Гэхдээ тэдний өгсөн зөвлөгөөг парламент заавал авч үзэж батлах  албагүй. Гэхдээ сүүлийн үед Пакистанд шашны хэт явцуу үзэлтнүүдийн нөлөө асар ихээр нэмэгдэж байгаа тул энэхүү хуулийг парламент батлахыг үгүйсгэх аргагүй юм.

“Шинэ хуулийн заалтуудыг олж авсан “Express Tribune” сонин зарим зүйлээс нь иш татжээ. Ингэхэд шинэ хуулинд “эхнэр нь нөхрийн үүрэг захирамжийг дагаж мөрдөхгүй эсхүл нөхрийн хүссэнээр хувцаслахгүй байгаа тохиолдолд нөхөр нь эхнэрээ зөөлөн зодохыг зөвшөөрнө” гэсэн байна.

Цаашлаад энэ хуулийг хижаб буюу лалын шашны дэгийн дагуу нөхөрт гарсан эмэгтэй хүн гадуур гарахдаа өмсөх ёстой нүүр, биеийг бүхэлд нь халхалсан өмсгөлийг өмсдөггүй, танихгүй хүмүүстэй нөхрийн зөвшөөрөлгүйгээр уулзаж үг сольдог, хөндлөнгийн хүмүүст дуулдахаар хэт чанга ярьдаг ба нөхрийн зөвшөөрөлгүйгээр хөндлөнгийн хүнд мөнгөн туслалцаа үзүүлдэг эмэгтэйчүүдийн эсрэг энэ хуулийг батлахыг санал болгосон байна.

Үүнээс өмнө Лалын үзэл суртлын зөвлөл нь “Эмэгтэйчүүдийн хүчирхийлэлээс хамгаалах хууль”-ийг лалын шашны ёс зүйд нийцэхгүй гээд авч үзэхээс татгалзаж байсан юм.