Монгол Улсын  Ерөнхий сайд Ч.Сайханбилэг Монгол Улсын иргэдэд эзэмшүүлсэн “Эрдэнэс Тавантолгой” ХК-ийн хувьцааг нэрлэсэн үнээр Засгийн газар худалдаж авахаар болсныг өнгөрсөн пүрэв гарагт дуулгасан.

Иргэн бүрт оногдсон 1072 ширхэг хувьцааны 30 хувьтай тэнцэх буюу 323 ширхэг хувьцааг арилжааны банкуудаар дамжуулан худалдаж авах бололцоог нээж өгсөн юм. “Сайн хувьцаа” хөтөлбөрийг хэрэгжүүлэх хүрээнд цаашид иргэдийн гарт үлдэх буюу 70 хувьтай тэнцэх хувьцааг нь Монголын хөрөнгийн биржээр дамжуулан худалдан авахаар төлөвлөж байна.

Иргэдийн 1072 хувьцааг худалдан авах эрх зөвхөн Засгийн газарт нээлттэй. Өнгөрсөн хугацаанд Засгийн газар иргэдийн тодорхой хэсгээс “Эрдэнэс Тавантолгой” ХК-ийн хувьцааг нь нэрлэсэн үнээр худалдан авсан. Нийт 2 сая 858 мянган иргэн хувьцаа эзэмшиж байгаа. Давхардсан тоогоор 278 мянган оюутанд нийт 138 тэрбум төгрөг, 2011 онд эрүүл мэндийн даатгалын шимтгэл хэлбэрээр 615 мянган иргэнд нийт 4,8 тэрбум төгрөгөөр, ахмад болон хөгжлийн бэрхшээлтэй 322 мянган иргэнд 322 тэрбум төгрөгөөр давхардсан тоогоор 1 сая 216 мянга 734 иргэнд 464,8 тэрбум төгрөгөөр хувьцааг нь мөнгөжүүлсэн байна.

Эдгээрээс бусад 1 сая 650 мянган иргэний хувьцаа мөнгөжөөгүй байгаа юм. Хэрэв иргэд хувьцаагаа худалдах хүсэлт гаргавал эхний ээлжинд 323 хувьцааг нь нэрлэсэн үнээр нь  худалдаж авна. Өнөөдөр арилжааны банкууд иргэдийг бүртгэж, баталгаажуулах ч энэ нь ямар нэг хугацаа заасан зүйл биш гэлээ. Хувьцаагаа баталгаажуулна гэж банкинд оочер дараалал үүсгэх шаардлага байхгүйг Ерөнхий сайд Ч.Сайханбилэг тайлбарласан.

Иргэд сайн дураар бүртгүүлэн баталгаажуулах учир заавал бүгд хамрагдах ёстой албан шаардлага биш хэмээн тодотгосон юм. Засгийн газарт хувьцаагаа худалдлаа гэхэд эхний ээлжийн 323 хувьцааг гурав хувааж авахаар  зохион байгуулжээ.