Энэ удаа умардынхан БНАСАУ-ын удирдагч Ким Чен Уныг Төрийн зөвлөлийн даргаар сонгосонтой холбогдуулан нийслэл Пеньянд олон мянган хүний сүрт жагсаал хийж баярласнаа илэрхийлсэн байна. Ким Ир Сений нэрэмжит хотын төв талбайд Солонгосын Хөдөлмөрийн намын удирдлагууд, төрийн болон цэргийн зүтгэлтнүүд, яам тамгын газрын төлөөлөгчид, Дотоодын аюулгүй байдлын хүчин, олон нийтийн байгууллага, багш, оюутнуудын төлөөлөл жагссан байна.

Цуглаан дээр Ардын дээд  хурлын тэргүүлэгчдйин дарга Ким Ён Нам хэлсэн үгэндээ “Ким Чен Уныг төрийн өндөр албанд сонгосон явдал тус улсад түүхэн ач холбогдолтой үйл явдал боллоо” гээд арми, ард түмнийг “Чучхегийн хувьсгалт үзэл санааг төгс ялуулах, хүчирхэг социалист гүрэн байгуулах, эх орноо нэгтгэхийн төлөө БНАСАУ-ын удирдагчийг нягт тойрон хүрээлэх”-ийг уриалжээ.
Арга хэмжээнд оролцогсод нам төрийн өндөр албан тушаал бүхий Ким Чен Унд үнэнчээ илэрхийлжээ.

Зургадугаар сарын 29-нд Пеньянд болсон Ардын дээд хурлын чуулганаар хуучин Улсын Батлан хамгаалах хороог Төрийн зөвлөл болгон өөрчилж даргаар нь Ким Чен Уныг депутатууд санал нэгтэй сонгосон юм.

Парламентын энэ чуулган тавдугаар сард болсон Солонгосын хөдөлмөрийн намын их хурлын дараагаар Ким Чен Уны засгийн газартай эв нэгдэлтэй байгаагийн илэрхийлэл болж байна. Энэ их хурлаар БНАСАУ-ын тэргүүнийг намын даргаар сонгосон юм. Үүний өмнө Ким Чен Ун намаа нэгдүгээр нарийн бичгийн даргын хувьд удирдаж байсан юм. Харин СХН-ын ерөнхий нарийн бичгийн даргаар БНАСАУ-ын удирдлагын шийдвэрээр энэ улсын удирдагч байсан Ким Чен Ирийг солонгосын ард түмний өмнө байгуулсан гавяаных нь төлөө мөнхөд сонгосон юм.
Ким Чен Ун өнөөдөр бас улсын зэвсэгт хүчнийг тэргүүлж БНАСАУ-ын маршал цолтой юм.