Монгол улсын Шинжлэх ухааны академийн Эрдэмтэн нарийн бичгийн дарга, академич Т.Галбаатар Энэтхэгийн нэрт монгол судлаач Локеш Чандраг өчигдөр хүлээн авч уулзжээ. Доктор Локеш Чандра нь Монгол Улсын ШУА-ийн гадаад гишүүн бөгөөд монгол судлалыг хөгжүүлэх, монголч эрдэмтдийг дэмжих, хоёр орны соёлын харилцааг хөгжүүлэхэд үнэтэй хувь нэмэр оруулсан хүн юм. Тэрээр Монгол Ганжуурыг бүрэн эхээр нь найруулан хэвлүүлсний зэрэгцээ Зава Дамдин нарын монгол мэргэдийн зохиол бүтээлүүдийг судлан шинжлэх, сурталчлан таниулах ажлыг олон жил биечлэн хийж ирсэн билээ. Мөн 1967 онд “Монгол-Түвдийн шинэ бурхад” нэртэй 20 боть зохиолыг эмхэтгэн хэвлүүлсэн байдаг. Дашрамд сонирхуулахад, доктор Локеш Чандрагийн тэргүүлдэг Гадаад орнуудтай соёлоор харилцах Энэтхэгийн зөвлөл жил бүр 50 монгол оюутан залуусыг Энэтхэгийн их, дээд сургуулиудад хүлээн авч бакалавр, магистр, докторын түвшний сургалтад хамруулдаг байна.