“Los Angeles Times” сонин Америкийн Калифорни мужид ойрын үед газар маш хүчтэй хөдлөх  эрсдэл байгаа тухай геофизикч эрдэмтэд анхааруулсан гэж бичсэн байна.

Номхон далайн ба Хойд Америкийн тектоник хавтангууд тулдаг завсар үүссэн Сан-Андреас хагарлын орчим сүүлийн үед идэвхжил ихээр бүртгэгдсэн тул ийм тооцоо хийгджээ. Зөвхөн өнгөрсөн долоо хоногт гэхэд л 4,3 магнитуд хүртэлх олон тооны жижиг газар хөдлөлийг эрдэмтэд бүртгэн авсан байна. Эдгээр жижиг газар хөдлөлт нь бүтэн хоног хүртэл үргэлжилж байсан. Мэдрэгч төхөөрөмжүүд нийт газрын чичиргээ бүртгэгдсэн 200 гаруй бүсийг бүртгэн авчээ.

Энэ олон жижиг чичирхийлэл нь Сан-Андреасын идэвхийг нэмэгдүүлж болзошгүй гэж эрдэмтэд үзсэн байна.
Калифорни мужийн эргийн орчим нийт 1300 км үргэлжилдэг энэхүү асар том хагарлын орчим хүчтэй газар хөдлөлт болдгоороо алдартай. Холливуд энэ тухай кино авсан байдгийг уншигч та үзэж байсан байх.

Энэ бүс нутагт 150-200 жил тутамд асар хүчтэй газар хөдлөлт болдог бөгөөд энэ хугацаа ч хэдийнэ хэтрээд байгаа нь байдлыг нэлээд эрсдэлтэй болгож буй. Калифорни мужид хамгийн сүүлд 1812 онд Сан-Хуан-Капистрано хотын орчим 7,5 магнитудын хүчтэй газар хөдлөлт бүртгэгдэж байжээ.