Хувийн мөрдлөг, шинжилгээний Stratfor компанийн шинжээчид Орос, АНУ-ын зэвсэгт хүчний мөргөлдөөн эхлэх хугацааг тоймлон гаргасан байна.

Шинжээчдийнхээр бол энэ явдал ойрын саруудад, тодруулбал 2016 оны дөрөвдүгээр улиралд эхлэх бололтой. Тэд үүнийгээ гурван үндсэн хүчин зүйлээр тайлбарлаж байна. Юун түрүү Обамагийн танхимын үйл ажиллагаа өндөрлөнө. Мөн ОХУ-ын эсрэг тавьсан хоригийн  талаар Европын холбоонд санал хураана. Гурав дахь хүчин зүйл нь энэ хоригоос болоод орос эдийн засгийн хямралд орсон явдал гэнэ.

Шинжээчид энэ хоёр улс Сири дэх тулааны талбарт тун бага хамтран ажиллаж байгаа тухай онцлоод Москва ч, Вашингтон ч Сирийн хямралыг дипломат аргаар шийдвэрлэхийг хүсэхгүй байгаа гэсэн байна.

Оросын Г.В.Плехановын нэрэмжит Эдийн засгийн их сургуулийн улстөр, нийгмийн ухааны тэнхимийн доцент Александр Перенжиева “Харамсалтай нь ОХУ, АНУ-ын цэргийн мөргөлдөөн Сирид гарах нь зайлшгүй. Америкчууд манай зөвлөхүүдийн ажиллаж байгаа сирийн засгийн газрын цэргийн байрлалыг бөмбөгдөж, буудаж байна. Оросын тал болохоор Америкчуудын байгаа босогчдын байрлалыг бөмбөгдөж байгаа” гэсэн байна.

Туркийн ерөнхий сайдын орлогч Нуман Куртулмуш бас Сири дэх нөхцөл байдал нь дэлхийг бүс нутгийн юм уу, дэлхийн дайн руу хөтөлж байна гэжээ.

TopNews-т бичсэнээр бол Орос, америкийн харилцаа сирийн Алеппод нөхцөл байдал муудсаны дараанаас бүр хурцадсан гэнэ. Тэнд зэвсэгт дайчид орон сууцуудыг буудаж, энгийн иргэдийг барьцаалан хүмүүнлэгийн тусламж оруулахад саад болсоор байна. Одоо ч хотод, эргэн тойронд нь тулаан болсоор байгаа юм.