АНУ-ын иргэн Маргарет Бомер жирэмснийхээ 16 дахь долоо хоногт төрөх хүүхэд нь хавдартай, энэ нь ургийн өсөлт, цаашдын амьдралд нь муугаар нөлөөлөхийг мэдэж авсан байна. Ийм хавдар 35 мянгад нэг тохиолддог гэж доктор Даррелл Касс хэлжээ.

Эмч нар  жирэмслэлтийг зогсоохоор шийдвэрлэсэн ч Бомер өөр арга зам хайхаар шийдвэрлэсэн байна. Тэр хүүхдийг төрөхөөс нь өмнө мэс засал хийж хавдрыг нь авахыг зөвшөөрснөөр  жирэмсний 24 дэх долоо хоногт нь урагт мэс засал хийж, энэ мэс засал таван цаг үргэлжилсэн байна.

Мэргэжилтнүүдийн хэлснээр бол хавдар авахад ердөө 20 минут зарцуулсан бол бусад цагт нь ургийг гаргаж авах, дахин эхийн хэвлийд нь суулгах ажилбар хийжээ. Энэ хугацаанд бүрэн төлжөөгүй ургийг “амьдруулах бүхий л арга хэмжээ” авч байснаар ургийн зүрх маш удаан ч гэсэн цохилж байж. Эцэст нь ургийг эхийн хэвлийд нь буцаан суулгаж чаджээ.

Маргарет Бомер жирэмснийхээ 36 дахь долоо хоног дээрээ 2,5 кг жинтэй эрүүл охин төрүүлж Линли Хоуп хэмээн нэрлэсэн байна. Төрсний нь дараа найм дахь долоо хоногт нь түүнээс хавдрын нь үлдэгдлийг авах мэс засал хийжээ.
Ийнхүү америк охин энэ хорвоод хоёр дахин мэндэлж, одоо эрүүл бойжиж байна.