АНУ-ын Ерөнхийлөгчийн сонгуульд ялалт байгуулсан Дональд Трамп хилийн хяналт, эрүүл мэнд, банк, ажлын байр зэрэг асуудлыг эн тэргүүний зорилт болгон ажиллана гэж мэдэгдэв.

Тэрбээр өнгөрсөн баасан гарагт “The Wall Street” сэтгүүлд ярилцлага өгөхдөө, “хууль бус цагаачдыг зогсоож, хар тамхийг хориглохын тулд хилийн хяналтыг чангатгана. Энэ миний хамгийн түрүүнд хийх ажил” хэмээн мэдэгдсэн байна.

Тэрбээр сонгуульд ялалт байгуулснаас хойш анх удаа ярилцлага өгч байгаа нь энэ юм.

Дээрх асуудлуудаас гадна тэрбээр эрүүл мэндийн салбарт шинэчлэл хийх, ажлын байр бий болгох зэргийг эн тэргүүний зорилт болгон ажиллана гэж мэдэгджээ. Мөн тэрбээр Обамагийн санаачилсан “Affordable Care Act” тусламжийн хуулийн зарим хэсгийг үргэлжлүүлж магадгүй гэдгээ хэлжээ.

Харин түүнээс Хиллари Клинтоны хувийн цахим шуудан ашигласан хэргийн тухай асуухад тэрбээр, тийм ч их ач холбогдол өгөөгүй гэж хариулсан байна. Гэвч тэрбээр сонгуулийн кампанит ажлынхаа үеэр энэ хэргийг шалгах тусгай прокурор томилно гэж мэдэгдэж байжээ.